সমগ্র দেশতে আজি দ্বিতীয় ৰাষ্ট্ৰীয় মহাকাশ দিৱস উদযাপন কৰা হয়। ২০২৩ চনৰ ২৩ আগষ্টত চন্দ্ৰযান-৩ অভিযানৰ বিক্ৰম লেণ্ডাৰৰ সফল অৱতৰণ আৰু চন্দ্ৰত প্ৰজ্ঞান ৰ’ভাৰ সফলভাৱে স্থাপনক সুঁৱৰি এই দিৱস উদযাপন কৰা হয়। দেশৰ অন্যান্য প্ৰান্তৰ লগতে বিশ্বনাথ জিলাৰ বিহালী স্নাতক মহাবিদ্যালয়ত পঞ্চম অসম বেটেলিয়নৰ এন চি চি তেজপুৰৰ উদ্যোগত ৰাষ্ট্ৰীয় মহাকাশ দিৱস উদযাপন কৰা হয়। অনুষ্ঠানত সমল ব্যক্তি হিচাপে তেজপুৰ বিশ্ববিদ্যালয়ৰ অধ্যাপক দেবেন্দ্ৰ চন্দ্ৰ বৰুৱাই ভাগ লয়। কর্ণেল টি এন উন্নীকৃষ্ণণ, মহাবিদ্যালয়ৰ অধ্যক্ষ ৰমেন বৰাকে ধৰি মহাবিদ্যালয়খনৰ অধ্যাপকৰ লগতে ৩ শতাধিক শিক্ষার্থীয়ে অংশগ্রহণ কৰে। অনুষ্ঠানৰ সৈতে সংগতি ৰাখি মহাবিদ্যালয়ৰ এন চি চি গোটৰ শিক্ষাৰ্থীসকলে এখন সজাগতামূলক নাট প্ৰদৰ্শন কৰে। হাফলং চৰকাৰী মহাবিদ্যালয়ত আজি 33 আচাম বেটেলিয়ন এন চি চি গোটে মহাকাশ অন্বেষণত ভাৰতৰ সাফল্যত আলোকপাত কৰি বিভিন্ন কাৰ্যসূচীৰে ৰাষ্ট্ৰীয় মহাকাশ দিৱস উদযাপন কৰে। অনুষ্ঠানত এন চি চি কেডেটসকলে সৌৰ জগত, মহাকাশযান, চন্দ্ৰযান-৩কে ধৰি ইছৰোৰ গুৰুত্বপূৰ্ণ অভিযানসমূহৰ আৰ্হি প্ৰদৰ্শন কৰে।