নগাঁও জিলাৰ কলং আৰু হাৰিয়াপাৰৰ শিখ বসতিপ্ৰধান বৰকোলাৰ কেন্দ্ৰীয় গুৰুদ্বাৰত আজি শ্ৰী গুৰুগ্ৰন্থ চাহেবজীৰ ৪২১ সংখ্যক প্ৰথম প্ৰকাশ দিৱস উদযাপন কৰা হয়। এই দিৱসৰ লগত সংগতি ৰাখি বৰকোলা উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ গুৰুমুখ সিঙে শিশু সাহিত্যিক উত্তম সিঙৰ পাগুৰী নামৰ এখন গ্ৰন্থ উন্মোচন কৰে। অনুষ্ঠানত মুখ্য অতিথি হিচাপে ভাগ লৈ সাংবাদিক দেৱজিৎ হাজৰিকাই অসমত বাস কৰা শিখসকলৰ অসমীয়া সমাজ জীৱনলৈ অৱদান সন্দৰ্ভত আলোকপাত কৰে। আজি গুৰুদ্বাৰ প্ৰাংগণত শিখ ধর্মীয় কীৰ্তন আৰু ধৰ্মীয় গীত পৰিৱেশন কৰা হয়। এই অনুষ্ঠানতে শিক্ষা, সংস্কৃতিকে ধৰি বিভিন্ন ক্ষেত্ৰত গৌৰৱ কঢ়িয়াই অনা বৰকোলা অঞ্চলৰ কেইবাগৰাকী ব্যক্তিক সম্বৰ্ধনা জনোৱা হয়।