কেন্দ্ৰীয় চৰকাৰে ব্ৰহ্মপুত্ৰত চীনৰ বৃহৎ নদীবান্ধ সম্পৰ্কীয় বিষয়টো নিৰীক্ষণ কৰি আছে। বৈদেশিক পৰিক্ৰমা মন্ত্ৰী ড০ এছ জয়শংকৰ আৰু চীনৰ বিদেশ মন্ত্ৰী ৱাং য়িৰ মাজত হোৱা শেহতীয়া বৈঠকতো বিষয়টো উত্থাপন কৰা হৈছিল। বৈদেশিক পৰিক্ৰমা ৰাজ্য মন্ত্রী কীৰ্তি বৰ্ধন সিঙে কালি সংসদত এই কথা প্ৰকাশ কৰে। চীনে তিব্বতৰ চাংপো নদীৰ নামনিভাগত বৃহৎ নদীবান্ধ নিৰ্মাণ কৰা বুলি ওলোৱা বাতৰি সন্দৰ্ভত ৰাজ্যসভাত সোধা এটা প্ৰশ্নৰ লিখিত উত্তৰত মন্ত্ৰীগৰাকীয়ে কয়, যে চীনৰ বৃহৎ নদীবান্ধ প্ৰকল্পৰ বিষয়টো ১৯৮৬ চনতে প্ৰথমবাৰৰ বাবে ৰাজহুৱা হৈছিল আৰু তেতিয়াৰে পৰা কেন্দ্ৰীয় চৰকাৰে ইয়াৰ সৈতে জড়িত সকলো দিশ নিৰীক্ষণ কৰি আহিছে। ইয়াৰ ভিতৰত বেইজিঙৰ প্ৰস্তাৱিত জলবিদ্যুৎ প্রকল্প আৰু ভাৰতৰ স্বাৰ্থ সুৰক্ষাৰ দিশটোও আছে বুলি মন্ত্ৰীগৰাকীয়ে উল্লেখ কৰে। তেওঁ কয়, যে চীনক সকলো বিষয় সময়ে সময়ে অৱগত কৰি অহা হৈছে। চাংপো-ব্রহ্মপুত্ৰ সম্পৰ্কীয় শেহতীয়া তথ্যৰ ভাগ-বাটোৱাৰাৰ বাবে ২০০২ চনত এখন চুক্তি স্বাক্ষৰিত কৰা হৈছিল আৰু সেই চুক্তি ২০০৮, ২০১৩ আৰু ২০১৮ চনত নৱীকৰণ কৰা হৈছিল বুলি মন্ত্ৰী বৰ্ধনে উল্লেখ কৰে। চীনে অৱশ্যে ২০১৭ চনত এই তথ্য প্ৰদান কৰা নাছিল বুলি তেওঁ জানিবলৈ দিয়ে।