ভাৰত আৰু অষ্ট্ৰেলিয়াই সকলোধৰণৰ সন্ত্ৰাসবাদক গৰিহণা দিছে আৰু সন্ত্ৰাসবাদক সমূলঞ্চে উৎখাত কৰাৰ বাবে আন্তঃৰাষ্ট্ৰীয় সহযোগিতা সুদৃঢ় কৰাৰ আৱশ্যকতাত গুৰুত্ব আৰোপ কৰিছে। নতুন দিল্লীত কালি অনুষ্ঠিত ভাৰত-অষ্ট্ৰেলিয়াৰ সন্ত্ৰাসবাদ প্ৰতিৰোধী যুটীয়া কাৰ্যগোটৰ চতুৰ্দশ বৈঠকৰ অন্তত দুয়োখন দেশে এইদৰে বিবৃতি দিছে। বিদেশ মন্ত্রালয়ে কৈছে যে দুয়ো পক্ষই সীমান্তৰে সন্ত্ৰাসবাদ চলোৱাৰ বাবে ছদ্মবেশী সন্ত্ৰাসবাদী ব্যৱহাৰক গৰিহণা দিছে। দুয়োখন দেশে লগতে ঘৰুৱা, আঞ্চলিক আৰু গোলকীয় সন্ত্ৰাসবাদৰ ভাবুকিৰ মূল্যায়ন সন্দৰ্ভতো মত-বিনিময় কৰে। আলোচনাত সন্ত্ৰাসবাদীৰ দ্বাৰা নতুন আৰু উদীয়মান প্রযুক্তি ব্যৱহাৰ, সন্ত্ৰাসবাদী গতিবিধিৰ বাবে ইণ্টাৰনেটৰ অপব্যৱহাৰ, মৌলবাদ, সন্ত্ৰাসবাদৰ বাবে পুঁজি যোগান, সংগঠিত অপৰাধ আৰু সন্ত্ৰাসবাদৰ মাজত যোগসূত্ৰৰ লেখিয়া বিষয়সমূহে স্থান লাভ কৰে। বিদেশ মন্ত্ৰালয়ৰ সন্ত্রাসবাদ প্রতিহতকৰণ বিষয়ৰ যুটীয়া সচিব কে ডি দেৱল আৰু অষ্ট্ৰেলিয়াৰ বিদেশ পৰিক্ৰমা তথা বাণিজ্য বিভাগৰ সন্ত্ৰাসবাদ প্রতিহতকৰণৰ দূত ৰিছাৰ্ড ফিকেছে এই আলোচনাত নিজ নিজ দেশক প্ৰতিনিধিত্ব কৰে।