গুৱাহাটী উচ্চ ন্যায়ালয় উত্তৰ গুৱাহাটীৰ ৰং মহললৈ স্থানান্তৰৰ বিৰোধিতা কৰি আজি উচ্চ ন্যায়ালয়ৰ বাৰ এছ’চিয়েছনে ন্যায়ালয়ৰ পুৰণি ভৱনৰ সন্মুখত অৱস্থান ধৰ্মঘট পালন কৰে। অলপতে অনুষ্ঠিত সাধাৰণ সভাৰ সিদ্ধান্ত মৰ্মে এছ’চিয়েছনৰ ভালে সংখ্যক সদস্যই আজি দিনৰ ১২ বজাৰ পৰা ২ বজালৈ এই সিদ্ধান্তৰ প্ৰতিবাদত ধ্ৱনি দি অৱস্থান ধৰ্মঘট পালন কৰে। বাৰ এছ’চিয়েছনৰ সভাপতি তথা জ্যেষ্ঠ অধিবক্তা কমল নয়ন চৌধুৰীয়ে কয়, যে অধিবক্তা সমাজক আস্থা আৰু বিশ্বাসত নলৈ উচ্চ ন্যায়ালয় স্থানান্তৰৰ সিদ্ধান্ত এক পক্ষীয়ভাৱে লোৱা হৈছে। ২০১৪ চনত প্ৰায় ১০০ কোটি টকা ব্যয়ৰে গুৱাহাটী উচ্চ ন্যায়ালয়ৰ নতুন ভৱন নিৰ্মাণ কৰা হৈছিল আৰু নতুন আৰু পুৰণি ভৱনৰ মাজত এটা সুৰংগ পথো নিৰ্মাণ কৰা হৈছিল। এনে স্থলত গুৱাহাটী উচ্চ ন্যায়ালয়ৰ উত্তৰ গুৱাহাটীলৈ স্থানান্তৰৰ যুক্তি-যুক্ততা নাই বুলি বাৰ এছ’চিয়েচনে যুক্তি দর্শায়।