পৱিত্ৰ গণেশ চতুর্থী উপলক্ষে ৰাষ্ট্ৰপতি শ্ৰীমতী দ্রৌপদী মুৰ্মু আৰু প্ৰধানমন্ত্ৰী নৰেন্দ্ৰ মোদীয়ে জনসাধাৰণলৈ শুভেচ্ছা জ্ঞাপন কৰিছে। সামাজিক মাধ্যমযোগে দিয়া এটা বাৰ্তাত ৰাষ্ট্ৰপতিয়ে কয়, যে এই উৎসৱত প্রজ্ঞা আৰু বিচক্ষণতাৰ দেৱতা গণেশৰ জন্মবার্ষিকী অতি আনন্দ আৰু ভক্তিৰে পালন কৰা হয়। বাধা-বিঘিনি নাশ কৰা ভগৱান গণেশে ৰাষ্ট্ৰৰ প্ৰগতিৰ পথ প্ৰদৰ্শন কৰি যাব বুলি তেওঁ আশা প্রকাশ কৰে। ৰাষ্ট্ৰপতিগৰাকীয়ে শক্তিশালী আৰু আত্মনিৰ্ভৰশীল ৰাষ্ট্ৰ গঢ়ি তোলাৰ বাবে প্ৰতিশ্ৰুতিবদ্ধ হ’বলৈও ৰাইজলৈ আহ্বান জনায়। প্রধানমন্ত্ৰী নৰেন্দ্ৰ মোদীয়ে ভক্তি আৰু বিশ্বাসেৰে ভৰা এই পৱিত্ৰ উৎসৱে সকলোলৈ মংগল কঢ়িয়াই আনিব বুলি আশা প্রকাশ কৰে। ভগৱান গণেশে তেওঁৰ সকলো ভক্তক সুখ, শান্তি আৰু সুস্বাস্থ্যৰ আশীবাদেৰে পুষ্ট কৰিব বুলি তেওঁ প্ৰাৰ্থনা কৰে। উল্লেখযোগ্য যে মহাৰাষ্ট্ৰত আজি সাংস্কৃতিক বৈচিত্ৰ্যৰ প্ৰতীক হিচাপে গণ্য কৰা গণেশোৎসৱ পালনৰ কাৰ্য্যসূচী উলহ-মালহেৰে আৰম্ভ হৈছে। অহা অনন্ত চতুৰ্দশী পর্যন্ত ১১টা দিন এই উদযাপন চলি থাকিব।