দেশৰ অন্যান্য প্ৰান্তৰ লগতে অসমতো আজি ধৰ্মীয় ৰীতি-নীতি আৰু উৎসাহ-উদ্দীপনাৰে সিদ্ধিদাতা, বিঘিনি নাশক গণেশ দেৱতাৰ পূজা-অৰ্চনা কৰা হয়। এই উপলক্ষে আজি গুৱাহাটী মহানগৰীৰ লগতে ৰাজ্যৰ বিভিন্ন প্ৰান্তৰ গণেশ মন্দিৰসমূহত পুৱাৰে অগণন ভক্তৰ সমাগম পৰিলক্ষিত হয়। গুৱাহাটী মহানগৰীৰ গণেশগুৰি, লতাশিল, নিউ গুৱাহাটী, পাঞ্জাবাৰী আৰু বীৰকুচিৰ গণেশ মন্দিৰত সিদ্ধিদাতাৰ আশীষ বিচাৰি ভক্তসকলে ভিৰ কৰে। মন্ত্ৰী পিযুষ হাজিৰকাই গণেশগুৰিৰ প্ৰসিদ্ধ গণেশ মন্দিৰত আশীষ গ্ৰহণ কৰি ৰাজ্যবাসীৰ কুশল কামনা কৰে ।
ফটাশিল জি এম চি নিউ কলনীত ড° বি আৰ আম্বেডকাৰ আৰু তেলেগু এছ’চিয়েচন অসমে গণেশ চতুর্থী উপলক্ষে ৪১ ফুট উচ্চতাৰ গণেশৰ এটা বৃহৎ মৃন্ময় মূর্তি সাজি উলিয়াইছে। গুৱাহাটীৰ পশ্চিম প্ৰান্তৰ শ্ৰীশ্ৰীলংকেশ্বৰ ধামৰ নামনিত থকা গণেশ মন্দিৰতো উলহ মালহেৰে গণেশ চতুর্থী উদ্যাপন কৰা হয় ৷
শিলচৰৰ বিভিন্ন প্ৰান্ততো পৰম্পৰাগত ৰীতি নীতিৰে গণেশ পূজাৰ আয়োজন কৰা হয়। শিলচৰৰ সোণাই ৰোড সাৰ্বজনীন গণেশ পূজা সমিতিয়ে এইবাৰ ৩ দিনীয়া কাৰ্যসসূচীৰে গণেশ পূজাৰ আয়োজন কৰিছে। পূজা সমিতিয়ে এইবাৰ প্ৰায় ১০ লাখ টকা ব্যয়েৰে অপাৰেছন সিন্দুৰ বিষয়বস্তুৰে আটক ধুনীয়া মণ্ডপ সাজি উলিয়াইছে। গোৱালপাৰা জিলাতো আজি ৰীতি-নীতিৰে গণেশ পূজা অনুষ্ঠিত হয়। হাতী মানুহৰ সংঘাত ৰোধ কৰাৰ লক্ষ্যৰে লক্ষীপুৰ অঞ্চলৰ মেধিপাৰা গাওঁত ৰাজহুৱাভাৱে গণেশ চতুৰ্থী পালন কৰা হয়।
