দৰং জিলাক দেশৰ ৰে’ল মানচিত্ৰত অন্তৰ্ভুক্ত কৰাৰ বাবে প্ৰায় চাৰে ৬ হাজাৰ কোটি টকা ব্যয় সাপেক্ষ ১২৮ দশমিক ৭-৬ কিলোমিটাৰ দৈৰ্ঘ্যৰ ৰে’লপথৰ চূড়ান্ত জৰীপত অনুমোদন হৈছে আৰু চলিত মাহতে এই প্ৰতিবেদন প্রকাশ পাব। দৰং-ওদালগুৰিৰ সাংসদ দিলীপ শ‍ইকীয়াই আজি মঙলদৈ মহাবিদ্যালয়ত প্ৰধানমন্ত্রী উচ্চতৰ শিক্ষা আঁচনিৰ অধীনত স্থাপন হ’বলগীয়া নতুন শৈক্ষিক ভৱন আৰু অত্যাধুনিক কম্পিউটাৰ গৱেষণাগাৰৰ নিৰ্মাণৰ শুভাৰম্ভ অনুষ্ঠানত অংশ লৈ এই কথা প্ৰকাশ কৰে। তেওঁ কয়, যে জিলাখনৰ ৰে’লপথ আৰু চাৰিলেনযুক্ত ৰাষ্ট্ৰীয় ঘাইপথ প্ৰকল্পৰ বাবে ২০২৬ চনৰ বিধানসভা নিৰ্বাচনৰ পূৰ্বে প্ৰাৰম্ভিক কাম আৰম্ভ হ’ব। উল্লেখযোগ্য যে সাংসদগৰাকীয়ে যোৱা ১৮ মাৰ্চত নতুন দিল্লীৰ ৰে’ল ভৱনত ৰে’ল মন্ত্ৰী অশ্বিনী বৈষ্ণৱক সাক্ষাৎ কৰি জিলাখনক ৰে’ল মানচিত্ৰত অন্তৰ্ভুক্ত কৰাৰ বাবে দৰংবাসীৰ দীৰ্ঘদিনীয়া দাবী সন্দৰ্ভত মন্ত্ৰীগৰাকীক অৱগত কৰিছিল। ৰে’লমন্ত্ৰীগৰাকীয়ে দৰং জিলাক সংযোগ কৰি নতুন ৰে’লপথ নিৰ্মাণৰ যাৱতীয় প্ৰস্তুতি সোনকালে আৰম্ভ কৰা হ’ব বুলি সাংসদগৰাকীক আশ্বাস দিছিল।