ধেমাজি জিলাৰ ডিমৌত কালি দুৰ্বৃত্তই এগৰাকী কৰ্তব্যৰত সাংবাদিকক আক্ৰমণ কৰা ঘটনা সন্দৰ্ভত আজি ধেমাজী প্ৰেছ ক্লাৱত এখন প্ৰতিবাদী সভা অনুষ্ঠিত হয়। জিলাখনৰ বিভিন্ন দল সংগঠনৰ প্ৰতিনিধি আৰু সচেতন ৰাইজে অংশগ্ৰহণ কৰা এই প্রতিবাদী সভাত মাধুৰ্য্য শ‍ইকীয়া নামৰ বৈদ্যুতিন চেনেলৰ সাংবাদিকগৰাকীক আক্ৰমনৰ ঘটনাত জড়িত দুর্বৃত্তক শীঘ্ৰে দৃষ্টান্তমূলক শাস্তি প্ৰদান কৰিবলৈ দাবী জনোৱা হয়। আমাৰ আগৰ বাতৰিতে কোৱা হৈছে যে, ধেমাজীৰ চিমেন-চিচি টঙানি উন্নয়ন খণ্ডৰ অন্তৰ্গত ডিমৌ পঞ্চায়তৰ সভাপতি নির্বাচন সম্পৰ্কীয় বাতৰি সংগ্ৰহৰ বাবে সাংবাদিকগৰাকী সেই স্থানত উপস্থিত হোৱাৰ সময়ত ২৫-৩০ জনীয়া দুৰ্বৃত্তৰ দলে লাঠি-জোং লৈ তেওঁক আক্ৰমণ কৰে। সাংবাদিকগৰাকী অৱশ্যে এই আক্ৰমণৰ পৰা প্ৰাণ লৈ পলাবলৈ সমৰ্থ হয়। ধেমাজীৰ জ্যেষ্ঠ সাংবাদিক দিলীপ কুমাৰ হাজৰিকাৰ পৌৰহিত্যত অনুষ্ঠিত আজিৰ প্ৰতিবাদী সভাত অসম জাতীয়তাবাদী যুৱ ছাত্ৰ পৰিষদ, ধেমাজী জিলা ছাত্ৰ সন্থা, টাই আহোম ছাত্ৰ সন্থা, লাচিত সেনাকে ধৰি প্ৰায়বোৰ দল -সংগঠনৰ প্ৰতিনিধিয়ে অংশগ্ৰহণ কৰি এই ঘটনাক তীব্ৰ ভাষাৰে গৰিহণা দিয়ে।