মুখ্যমন্ত্রী ড০ হিমন্ত বিশ্ব শৰ্মাই আজি কোকৰাঝাৰ জিলাৰ চালাকাতি পৰিষদীয় সমষ্টিৰ কালী পুখুৰীত বিজয় সংকল্প সমাৱেশত অংশগ্ৰহণ কৰে। আসন্ন বি টি চি নিৰ্বাচনৰ পৰিপ্ৰেক্ষিতত মুখ্যমন্ত্ৰীয়ে জনসাধাৰণক উদ্দেশি দিয়া ভাষণত বি টি আৰৰ শান্তি-সম্প্রীতি বৰ্তাই ৰখাৰ বাবে চৰকাৰৰ প্ৰতিশ্ৰুতিবদ্ধতাৰ কথা দোহাৰে। তেওঁ কয়, যে দীৰ্ঘদিনৰ অশান্ত পৰিস্থিতিৰ পাছত বি টি আৰত প্ৰতিষ্ঠা হোৱা শান্তি অক্ষুণ্ণ ৰখাৰ লগতে সৰ্বাত্মক উন্নয়ন আৰু সকলো স্তৰৰ জনসাধাৰণক সমসুবিধা প্ৰদানৰ লক্ষ্যৰে চৰকাৰে প্ৰচেষ্টা চলাই আছে। তেওঁ কয়, যে অহা ২৮ আগষ্টৰ ভিতৰত বিজেপিয়ে বি টি চি নিৰ্বাচনৰ বাবে কিমানখন আসনত প্রার্থী দিব সেই বিষয়ে চূড়ান্ত সিদ্ধান্ত গ্রহণ কৰিব। দুই-এদিনৰ ভিতৰতে নিৰ্বাচনী আৰ্হি আচৰণবিধি বলৱৎ হ’ব আৰু চৰকাৰী অধিসূচনা জাৰি কৰাৰ ৪৮ ঘণ্টাৰ ভিতৰতে বিজেপিয়ে প্রার্থী তালিকা প্রকাশ কৰিব। আজি মুখ্যমন্ত্ৰীৰ সৈতে এই সভাত মন্ত্রী অশোক সিংহল আৰু দলৰ কেইবাগৰাকীও জ্যেষ্ঠ নেতা উপস্থিত থাকে।