ৰাজ্যত আজি পোষণ পষেক আৰম্ভ হৈছে। কামৰূপ জিলাত সমাজ কল্যাণ বিভাগৰ উদ্যোগত জিলা আয়ুক্ত দেৱ কুমাৰ মিশ্ৰই আমিনগাঁৱৰ লোকনিৰ্মাণ বিভাগৰ সভাগৃহত পোষণ পষেক শুভাৰম্ভ কৰে। সভাত জিলা আয়ুক্তগৰাকীয়ে বছৰৰ প্ৰতি দিনতে জিলাখনৰ শিশুসকলক স্বাস্থ্যৰ যতন আৰু সুৰক্ষা ল’বলৈ জিলাখনৰ প্ৰতিটো বিভাগক আহ্বান জনায়। পোষক পষেকৰ কাৰ্যসূচীত জিলাখনৰ আয়ুস, স্বাস্থ্য, জনস্বাস্থ্য, শিক্ষা বিভাগৰ বিষয়াসকলে অংশগ্ৰহণ কৰে। অহা ১৫ দিনৰ ভিতৰত জিলাখনত মাতৃগৰ্ভত শিশুৰ পঞ্চামৃত আৰু নৱজাতক শিশুৰ অন্নপ্রাশন অনুষ্ঠিত হ’ব বুলি সমাজ কল্যাণ বিভাগৰ বিষয়া ভূপেন ভট্টাচার্যই অনুষ্ঠানত জানিবলৈ দিয়ে। পোষণ পষেকত জিলাখনত থকা ৩ হাজাৰ ১১৭টা অংগনৱাড়ী কেন্দ্ৰত যিকোনো শিশু, গৰ্ভৱতী আৰু প্ৰসূতিৰ লগতে কিশোৰীসকলে নিজাববীয়াকৈ নাম পঞ্জীয়ন কৰিব পাৰিব বুলি তেওঁ জানিবলৈ দিয়ে। দৰং জিলাতো পোষণ পষেকৰ কাৰ্যসূচী অনুষ্ঠিত হয়। জিলা আয়ুক্তৰ সভাকক্ষত এই কাৰ্যসূচীৰ শুভাৰম্ভ কৰা হয় ৷ বৰপেটা জিলাতো পোষণ পষেকৰ কাৰ্যসূচীৰ আৰম্ভণি হৈছে। আজিৰ উদ্বোধনী অনুষ্ঠানত সমাজ কল্যাণ বিভাগৰ লগতে ৰাষ্ট্ৰীয় স্বাস্থ্য অভিযান অসমৰ জিলা পৰ্যায়ৰ বিষয়াসকলে অংশগ্ৰহণ কৰে।