গোৱাৰ পানাজীত অনুষ্ঠিত ৫৬ সংখ্যক ভাৰত আন্তঃৰাষ্ট্ৰীয় চলচ্চিত্ৰ মহোৎসৱ- IFFI-ৰ কালি সামৰণি পৰে। ড° শ্যামাপ্রসাদ মুখার্জী ষ্টেডিয়ামত অনুষ্ঠিত আকর্ষণীয় সামৰণি অনুষ্ঠানত উপস্থিত থাকি গোৱাৰ মুখ্যমন্ত্রী প্রমোদ সাৱন্তে কয়, যে প্রতি বছৰৰ দৰে এইবাৰো IFFIত সৃষ্টিশীল মনৰ বিভিন্ন কুশীলৱসকলৰ সমাৱেশ ঘটে। এই সমাৱেশে চিন্তা আৰু সৃষ্টিশীলতাৰ অভূতপূৰ্ব সমন্বয় সাধন সম্ভৱ কৰিছে বুলিও শ্রীসাৱন্তে উল্লেখ কৰে।
ভাৰতীয় চিনেমাৰ কিংবদন্তি অভিনেতা ৰজনী কান্তৰ ৫০ বছৰীয়া অভিনয় জীবনক মহোৎসবস্থলীত বিশেষ সমাদৰ প্ৰদৰ্শন কৰা হয়।
মহোৎসৱৰ কালি অন্তিম দিনা ফ্রান্স, ছিংগাপুৰ আৰু থাইলেণ্ডৰ যুটীয়া প্রযোজনাৰে নিৰ্মিত থাই ভাষাৰ চিনেমা এ ইউজফুল ঘোষ্ট প্রদর্শন কৰা হয়। আছলেই মেফেয়াৰৰ স্কীন অব্ য়ুথ চিনেমাখনক চলিত বৰ্ষৰ IFFI-ৰ শ্ৰেষ্ঠ চিনেমাৰ সোণালী ময়ূৰৰ বঁটা আগবঢ়োৱা হয়। শ্রেষ্ঠ পৰিচালকৰ ৰূপালী ময়ূৰ গোন্ধাল চিনেমাৰ বাবে পৰিচালক সন্তোক দাভাকাৰলৈ আগবঢ়োৱা হৈছে। এৰিক শ্বেনছনক ইউনোস্কৰ গান্ধী বঁটা ছেফ হাউছ ছবিখনৰ বাবে আগবঢ়োৱা হয়। সামৰণি উপলক্ষে আয়োজিত বর্ণাঢ্য সাংস্কৃতিক অনুষ্ঠানত অসমৰ ৰণজিৎ গগৈৰ নেতৃত্বত এটা বিহু দলে অংশ লয়।
