বি টি আৰৰ মুখ্য কার্যবাহী সদস্য প্রমোদ বড়োৱে আজি কোকৰাঝাৰ জিলাৰ পৰ্বতঝৰা মহকুমাৰ কাজিগাঁও গাৰোপাৰা যুৱ ক্রীড়া ক্লাবত আয়োজিত অনুষ্ঠানত ১,২৪৫টা ভূমিহীন পৰিয়ালক ভূমি অধিকাৰৰ প্ৰমাণপত্ৰ বিতৰণ কৰে। এই উপলক্ষে আয়োজিত অনুষ্ঠানত দিয়া ভাষণত শ্ৰীবড়োৱে বি টি আৰৰ প্ৰতিটো পৰিয়ালক ভূমি দিয়াৰ বাবে প্রশাসন দায়বদ্ধ বুলি উল্লেখ কৰে। তেওঁ কয় যে পর্বতঝোৰাৰ ১,৫০০ৰো অধিক পৰিয়ালক ভূমিৰ অধিকাৰ প্ৰদান ব্যৱস্থাৰে সামৰি লোৱা হব আৰু ১০ জুলাইৰ পূৰ্বে তেওঁলোকে এই প্ৰমাণপত্ৰ লাভ কৰিব। তেওঁ কয় যে ভূমি অধিকাৰ প্ৰদানৰ দ্বিতীয়টো পদক্ষেপ বিছমুঠি দ্বিতীয় পৰ্যায় অহা মাহত আৰম্ভ কৰা হব। ইয়াৰ দ্বাৰা বি টি আৰত ভূমিহীনক ভূমি প্রদান প্ৰক্ৰিয়াটো ত্বৰান্বিত কৰা হব বুলি শ্ৰীবড়োৱে উল্লেখ কৰে। এই অনুষ্ঠানত বি টি আৰৰ কেইবাগৰাকীও কাৰ্যবাহী সদস্য আৰু প্ৰশাসনীয় বিষয়া উপস্থিত থাকে।