শিৱসাগৰৰ ৰংঘৰ, যমুনা, বংগনাথ মন্দিৰ আৰু এছিয়াৰ প্ৰথমখন চিৰিয়াখানাৰূপে জনজাত পহুগড়ক দখলমুক্ত কৰি সংৰক্ষণ কৰাৰ বাবে সদৌ টাই আহোম ছাত্ৰ সন্থাই দাবী উত্থাপন কৰিছে। কালি ৰংঘৰৰ বাকৰিত আয়োজিত এখন সংবাদ মেলত সংগঠনটোৱে জিলাখনৰ ঐতিহাসিক আৰু পৌৰাণিক সম্পদসমূহ দখলমুক্ত কৰি সংৰক্ষণ কৰাৰ দাবী জনায়। আটাছুৱে ইয়াৰ বাবে পূৰাতত্ব বিভাগ আৰু জিলা প্ৰশাসনক সাদিনৰ সময়সীমা বান্ধি দিয়ে। তেওঁলোকে ছশ বছৰীয়া আহোম ৰাজত্বৰ কীৰ্তি চিহ্নসমূহ দখলকাৰীৰ কৱলৰ পৰা মুক্ত কৰাৰ লগতে উচিতভাৱে সংৰক্ষণ কৰিবলৈ দাবী জনায়। সংগঠনটোৱে লগতে ৰংঘৰ চৌহদৰ কৃত্ৰিম বানৰ সমস্যা দূৰ কৰাৰ বাবে জল নিষ্কাশন ব্যৱস্থা উন্নত কৰিবলৈ সংশ্লিষ্ট কর্তৃপক্ষক আহ্বান জনায়।