মাজুলীত পৰহিলৈ জাপানীজ এনকেফেলাইটিছৰ ছিটা প্ৰদান অভিযান আৰম্ভ হ’ব। ১৫ বছৰৰ পৰা ৬৫ বছৰ বয়সৰ সকলো প্ৰাপ্তবয়স্ক লোকক সামৰি ল’বলগীয়া এই কাৰ্য্যসূচী ২১ দিন ধৰি চলিব। এই প্রতিষেধক প্রদান কাৰ্য্যসূচী সম্পূর্ণ বিনামূলীয়া, নিৰাপদ আৰু ফলপ্ৰসূ হোৱাৰ লগতে ই দীৰ্ঘকালীন সুৰক্ষা প্ৰদান কৰিব। জিলা স্বাস্থ্য আৰু পৰিয়াল কল্যাণ বিভাগে মাজুলী জিলাক জাপানী এনকেফেলাইটিছৰ পৰা মুক্ত কৰাৰ লক্ষ্যত উপনীত কৰাৰ বাবে সকলো নাগৰিককে এই প্রতিষেধক গ্ৰহণ কৰিবলৈ আহ্বান জনাইছে।
শ্রীভূমি জিলাতো ১৫ৰ পৰা ৬৫ বছৰ বয়সৰ লোকসকলক সামৰি জাপানী এনকেফেলাইটিছৰ প্ৰতিষেধক প্রদান কাৰ্য্যসূচী চলি আছে। শ্রীভূমিৰ ভাৰপ্ৰাপ্ত জিলা উন্নয়ন আযুক্তৰ অধ্যক্ষতাত অনুষ্ঠিত এখন সভাত কালি প্ৰতিষেধক প্ৰদান কাৰ্যসূচীৰ অগ্ৰগতিৰ বুজ লোৱা হয়। সভাত এই প্ৰতিষেধকে আগবঢ়োৱা দীৰ্ঘকালীন সুৰক্ষাৰ বিষয়ে জনসাধাৰণক অৱগত কৰোৱা হয়।
