মণিপুৰত উপত্যকা জিলাসমূহৰ বিভিন্ন স্থান বিশেষকৈ ইম্ফল পূৱ আৰু থৌবাল জিলাসমূহৰ বান পৰিস্থিতি এতিয়াও শোচনীয় হৈ আছে। উখৰুল জিলাত বৰষুণৰ বাবে যোৱা কেইদিনমানত ভূমিস্খলনৰ ঘটনা সংঘটিত হৈছে। ফলস্বৰূপে যাত্ৰী আৰু বাণিজ্যিক পৰিবহণ ব্যৱস্থা ব্যাহত হৈছে। পৰিস্থিতিৰ প্ৰতি লক্ষ্য ৰাখি ৰাজ্য চৰকাৰে সকলো বিদ্যালয়-মহাবিদ্যালয়ৰ আজিৰ দিনটো বন্ধ ঘোষণা কৰিছে। উপত্যকা জিলাসমূহৰ মাজেৰে বৈ যোৱা অধিকসংখ্যক নদী বিপদসীমাৰ ওপৰেৰে বৈ আছে। বিভিন্ন স্থানত থৌবাল নদীয়ে ভয়ংকৰ ৰূপ ধাৰণ কৰিছে। ইম্ফল নদী, ইৰিল নদী আৰু নামবুল নদীৰো জলপৃষ্ঠ বৃদ্ধি হৈছে। পূব ইম্ফল জিলাৰ লামলাই বিধান সভা সমষ্টিত আজি বান পৰিস্থিতি অধিক ভয়াৱহ হৈছে। বানপানীত ক্ষতিগ্রস্ত লোকসকলে শিবিৰত আশ্ৰয় লৈছে আৰু সংশ্লিষ্ট কর্তৃপক্ষই তেওঁলোকক অত্যাৱশ্যকীয় সামগ্রী যোগান ধৰিছে।