ভাৰত আৰু ছুইডেনৰ অংশীদাৰিত্বই দুখন পৃথক অৰ্থনীতিৰ ৰাষ্ট্ৰই কিদৰে লক্ষ্য আৰু সহযোগিতাৰ বিনিময়েৰে পাৰস্পৰিক লাভ অৰ্জন কৰিব পাৰে, সেই কথাৰ আৰ্হি দেখুৱাই বুলি কেন্দ্ৰীয় বাণিজ্য আৰু উদ্যোগ মন্ত্ৰী পীয়ুষ গোৱেলে প্ৰকাশ কৰিছে। ছুইডেনত কালি ভাৰত-ছুইডেন বাণিজ্য আৰু বিনিয়োগ সম্পৰ্কীয় নীতিৰ উচ্চ পৰ্যায়ৰ বৈঠকত দিয়া ভাষণত মন্ত্ৰীগৰাকীয়ে এই কথা প্ৰকাশ কৰে। এই অনুষ্ঠানত শ্ৰী গোৱেলে ভাৰত আৰু ছুইডেনৰ শীৰ্ষস্থানীয় ব্যৱসায়িক নেতা আৰু ছুইডেনৰ উদ্যোগ মহাসংঘৰ প্ৰতিনিধিৰ সৈতে মত-বিনিময় কৰে। সামাজিক মাধ্যমৰ এটা বাৰ্তাত কেন্দ্ৰীয় মন্ত্ৰীগৰাকীয়ে কয়, যে এই অনুষ্ঠানত উন্মোচিত প্ৰস্তাৱিত ভাৰত-ইউৰোপীয়ান সংঘৰ মুক্ত বাণিজ্য চুক্তিৰ যুটীয়া বিবৃতি পত্ৰত ভাৰতৰ ৰাষ্ট্ৰসমূহৰ সৈতে অর্থনৈতিক বান্ধোন শক্তিশালী কৰা আৰু সৰ্বাত্মক বিকাশ নিশ্চিত কৰাৰ ওপৰত গুৰুত্ব আৰোপ কৰা হৈছে।