ৰাজ্য চৰকাৰে বাংলাদেশী অনুপ্ৰৱেশকাৰীৰ বিৰুদ্ধে গ্ৰহণ কৰা ব্যৱস্থা আৰু উচ্ছেদ অভিযানৰ প্ৰতি কেন্দ্ৰীয় চৰকাৰৰ পূৰ্ণ সমর্থন আছে আৰু এইক্ষেত্ৰত কেন্দ্ৰই অসমক সকলো ধৰণে সহায় কৰিব। কেন্দ্ৰীয় গৃহমন্ত্রী অমিত শ্বাহে বিজেপি আৰু অগপৰ পঞ্চায়ত প্ৰতিনিধিৰ সন্মিলনত দিয়া ভাষণত কেন্দ্ৰীয় চৰকাৰৰ এই দৃষ্টিভংগী স্পষ্ট কৰা বুলি মুখ্যমন্ত্ৰী ড০ হিমন্ত বিশ্ব শৰ্মাই মন্তব্য কৰিছে। দিছপুৰত কালি এখন সংবাদমেলত ড০ শৰ্মাই কয়, যে ৰাজ্য চৰকাৰে ১৯৭১ চনৰ পাছত আহি অসমত বাস কৰি থকা অবৈধ বাংলাদেশী আৰু নতুনকৈ অনুপ্ৰৱেশ কৰা বাংলাদেশীক সীমান্তৰে ঘূৰাই পঠিওৱাৰ প্ৰক্ৰিয়া অব্যাহত ৰাখিছে। তেওঁ কয়, যে প্ৰতিদিনে ২৫ৰ পৰা ৩০ জন অবৈধ বাংলাদেশীক ঘূৰাই পঠিয়াই থকা হৈছে আৰু ভৱিষ্যতে এই সংখ্যা বৃদ্ধি পাব। ঘূৰাই পঠিওৱাৰ প্ৰক্ৰিয়া নিৰন্তৰভাৱে আৰু তীব্ৰগতিত চলি থাকিব বুলি মুখ্যমন্ত্ৰীগৰাকীয়ে ঘোষণা কৰে। তেওঁ কয়, যে সম্পূর্ণ আইনী প্রক্ৰিয়াৰে অনুপ্ৰৱেশকাৰীক ওভতাই পঠোৱা কাৰ্য চলি আছে। উচ্ছেদ অভিযান সন্দৰ্ভত মত প্ৰকাশ কৰি ড০ শৰ্মাই কয়, যে অবৈধ দখলকাৰীৰ কবলৰ পৰা শেষ টুকুৰা মাটি উদ্ধাৰ নকৰালৈকে এই অভিযান চলি থাকিব।