সমগ্ৰ ৰাষ্ট্ৰই আজি ভাৰতৰত্ন সন্মানেৰে বিভূষিত ড০ বি আৰ আম্বেদকাৰৰ ৭০ সংখ্যক মহা পৰিনিৰ্বাণ দিৱস বা মৃত্যু বার্ষিকী উপলক্ষে সংবিধান প্ৰণেতাগৰাকীলৈ শ্রদ্ধা নিবেদন কৰিছে। এই উপলক্ষে ৰাষ্ট্ৰ গঠনত আম্বেদকাৰৰ অভূতপূৰ্ব বৰঙণিৰ বিষয়ে আলোকপাত কৰি ভালেমান অনুষ্ঠানৰ আয়োজন কৰা হৈছে।
ৰাষ্ট্ৰপতি শ্ৰীমতী দ্রৌপদী মুর্মু, উপৰাষ্ট্ৰপতি চি পি ৰাধাকৃষ্ণণ, প্রধানমন্ত্ৰী নৰেন্দ্ৰ মোদী, লোকসভাৰ অধ্যক্ষ ওম বিৰলা আৰু অন্য বিশিষ্ট ব্যক্তিসকলে মহাপৰিনিৰ্বাণ দিৱস উপলক্ষে আজি সংসদ ভৱন চৌহদত সংবিধান প্ৰণেতাগৰাকীলৈ পুস্পার্ঘ্য নিবেদন কৰে। প্ৰধানমন্ত্রী মোদীয়ে সামাজিক মাধ্যমযোগে দিয়া এটা বাৰ্তাত কয়, যে বাবাচাহেব আম্বেদকাৰৰ ভৱিষ্যদধী নেতৃত্ব আৰু ন্যায়, সমতা তথা সাংবিধানিক প্ৰমূল্যৰাজিৰ প্ৰতি তেওঁৰ অভূতপূৰ্ব প্রতিশ্রুতিবদ্ধতাই দেশৰ যাত্ৰাত আজিও গুৰি ধৰি আহিছে। আম্বেদকাৰে ভৱিষ্যৎ প্ৰজন্মক মানবীয় মর্যাদা অক্ষুন্ন ৰাখিবলৈ আৰু গণতন্ত্ৰৰ ভেঁটি সুদৃঢ় কৰিবলৈ অনুপ্ৰেৰণা যোগায় যাব বুলি তেওঁ মন্তব্য কৰে।
