আহমেদাবাদত অনুষ্ঠিত টি-২০ ক্রিকেট শৃংখলাৰ পঞ্চম তথা অন্তিমখন খেলত যোৱা নিশা ভাৰতে দক্ষিণ আফ্ৰিকাক ৩০ ৰানত পৰাস্ত কৰি শৃংখলা দখল কৰে। ভাৰতে প্ৰথমে বেট ধৰাৰ আমন্ত্ৰণ লাভ কৰি নিৰ্ধাৰিত ২০ অভাৰত ৫ উইকেটৰ বিনিময়ত ২৩১ ৰান সংগ্ৰহ কৰে। তিলক বার্মাই সৰ্বাধিক ৭৩ আৰু হার্ডিক পাণ্ডিয়াই ৬৩ ৰান কৰে। হাৰ্ডিকে মাত্র ১৬টা বলত অর্ধশতক কৰি দ্ৰুত ৰান কৰা দ্বিতীয় ভাৰতীয় খেলুৱৈ হিচাপে পৰিগণিত হয়। দক্ষিণ আফ্ৰিকাৰ হৈ কৰ্বিন বছে দুটা উইকেট লাভ কৰাৰ লগতে অৰ্টনেইল বাৰ্টমেন আৰু জৰ্জ লিণ্ডেই এটাকৈ উইকেট দখল কৰে।
দক্ষিণ আফ্ৰিকাই ২৩২ ৰানৰ বিজয় লক্ষ্যৰে খেল আৰম্ভ কৰি নিৰ্ধাৰিত ২০ অভাৰত ৮টা উইকেট হেৰুৱাই ২০১ ৰান কৰিবলৈ সমৰ্থ হয়। দলৰ হৈ কুইণ্টন ডি ককে ৬৫ ৰান কৰে। বৰুণ চক্ৰৱৰ্তীয়ে ৫টা উইকেট দখল কৰে। হার্ডিক পাণ্ডিয়াক প্লেয়াৰ অৱ দা মেচ আৰু বৰুণ চক্ৰৱৰ্তীক প্লেয়াৰ অৱ দা ছিৰিজ ঘোষণা কৰা হয়।
পাঁচখনীয়া টি-২০ শৃংখলাটোত ভাৰতে ৩-১ৰ ব্যৱধানত জয়লাভ কৰে। ইয়াৰে চতুৰ্থখন খেল ঘন কুঁৱলীৰ বাবে বাতিল কৰিবলগীয়া হয়।