জম্মু-কাশ্মীৰৰ উপ ৰাজ্যপাল মনোজ সিনহাই আজি পুৱা জম্মুৰ ভগৱতী নগৰ বেচ কেম্পৰ পৰা পতাকা জোকাৰি অমৰনাথ যাত্ৰাৰ তীৰ্থযাত্ৰীৰ প্ৰথমটো দলৰ যাত্ৰাৰ শুভাৰম্ভ কৰে। কাশ্মীৰ উপত্যকাত থকা অমৰনাথ গুহা দৰ্শনৰ বাৰ্ষিক অমৰনাথ যাত্ৰা কাইলৈৰ পৰা পেহেলগাম আৰু বালতল পথেৰে আৰম্ভ হ’ব। সংবাদ মাধ্যমৰ আগত উপ ৰাজ্যপাল শ্রীসিনহাই কয় যে বিগত তিনি চাৰি বৰ্ষত অমৰনাথ যাত্ৰাৰ যাত্ৰীসকলৰ বাবে ভালেমান ব্যৱস্থা গ্ৰহণ কৰা হৈছে। তেওঁ কয় যে চলিত বৰ্ষটো জম্মু-কাশ্মীৰ প্ৰশাসনে নিৰাপত্তা ব্যৱস্থা কটকটীয়া কৰি গঢ়ি তোলাৰ লগতে যাত্ৰীসকলৰ সুবিধাৰ প্ৰতি লক্ষ্য ৰাখি আন প্ৰয়োজনীয় ব্যৱস্থাও গ্ৰহণ কৰা হৈছে। যাত্ৰীৰ নিৰাপত্তা আৰু যান বাহনৰ গতি বিধি নিৰীক্ষণ কৰাৰ বাবে ৰাষ্ট্ৰীয় ঘাই পথত ঠায়ে ঠায়ে চি চি টি ভি কেমেৰা সংস্থাপন কৰা হৈছে।