চাহ বাগিচাৰ শ্ৰমিকসকলে অহা ১০ ছেপ্তেম্বৰৰ ভিতৰত দুৰ্গা পূজাৰ বানছ লাভ কৰিব লাগিব বুলি কাছাৰ জিলা প্রশাসনে নিৰ্দেশনা জাৰি কৰিছে। কাছাৰ জিলা আয়ুক্ত মৃদুল যাদৱৰ নেতৃত্বত আজি অনুষ্ঠিত এখন সভাত এই সন্দৰ্ভত নিৰ্দেশ দিয়া হৈছে। বাগিচাসমূহৰ কৰ্তৃপক্ষই অহা ৩১ আগষ্টৰ ভিতৰত বানছ ঘোষণা কৰিব লাগিব বুলি জিলা প্রশাসনে নির্দেশ দিছে। ঘোষিত বানছ যোৱা বছৰৰ তুলনাত কম হ’ব নোৱাৰিব বুলি জিলা আয়ুক্তগৰাকীয়ে সভাত স্পষ্ট কৰি দিয়ে। চাহ শ্রমিকসকলে সময়মতে কোনো সমস্যা নোহোৱাকৈ বানছ লাভ কৰিবলৈ সকলো পক্ষকে একেলগে কাম কৰিবলৈ তেওঁ আহ্বান জনায়। জিলা আয়ুক্তগৰাকীয়ে সভাত বানছ বিতৰণৰ লগতে আইন শৃংখলা বজাই ৰাখিবলৈ প্ৰশাসন আৰু আৰক্ষীক বিশেষ নিৰাপত্তা ব্যৱস্থা গ্ৰহণ কৰিবলৈ নিৰ্দেশ দিয়ে। সভাত প্ৰশাসনৰ লগতে আৰক্ষী, বেংক, শ্রম বিভাগ আৰু চাহ শ্রমিক সংগঠনৰ প্ৰতিনিধিও উপস্থিত থাকে।