কামৰূপ মহানগৰ জিলাৰ ক্ষেত্ৰীত কাইলৈ ইজৰাইলৰ ৰাষ্ট্রদূত বিঅভেন আজাৰৰ উপস্থিতিত মুখ্যমন্ত্রী ড০ হিমন্ত বিশ্ব শর্মাই মুকলি কৰিবলগীয়া ইণ্ডো-ইজৰাইল চেণ্টাৰ অব এক্সেলেন্স ফৰ ভিজিটেবলছ শীর্ষক কেন্দ্ৰটোৰ স্থান আজি কৃষি মন্ত্রী অতুল বৰাই পৰিদৰ্শন কৰে। অসম ৰাজ্যিক উদ্যান শস্য অভিযানৰ অধীনত ভাৰত-ইজৰাইল কৃষি প্রকল্প অর্থাৎ আই আই এ পিৰ অংশীদাৰিত্বৰে এই কেন্দ্ৰটো স্থাপন কৰা হৈছে। অত্যাধুনিক প্রযুক্তিৰ সুবিধাৰে সুসজ্জ্বিত এই কেন্দ্ৰটোৰ জৰিয়তে বাণিজ্যিক মূল্য থকা শস্যৰ উৎপাদনত গুৰুত্ব আৰোপ কৰা হৈছে। তদুপৰি বছৰজোৰা খেতিৰ বাবে কৌশলগত পৰিকল্পনাৰে কৃষকসকলক উপকৃত কৰাৰ প্ৰয়াস কৰা হৈছে। মন্ত্ৰী শ্ৰীবৰাই কয় যে অত্যাধুনিক প্রযুক্তিৰে আবতৰীয়া শাক-পাচলিৰ খেতি কৰাৰ ক্ষেত্ৰতো গুৰুত্ব দিয়া হৈছে। মন্ত্ৰীগৰাকীয়ে আজি কেন্দ্ৰটো পৰিদৰ্শন কৰি কাইলৈৰ উদ্বোধনী অনুষ্ঠানৰ প্ৰস্তুতি খতিয়ান লয়। তেওঁ লগতে দায়িত্ববাহী বিষয়াসকলক এই কাম নিয়াৰিকৈ কৰাৰ বাবে আহ্বান জনায়। এই পৰিদৰ্শনৰ সময়ত কৃষি বিভাগৰ আয়ুক্ত সচিব তথা কৃষি উৎপাদন আয়ুক্ত অৰুণা ৰাজোৰিয়াৰ লগতে অন্যান্য বিষয়াসকল উপস্থিত থাকে।