প্রধানমন্ত্ৰী নৰেন্দ্ৰ মোদীয়ে কালি বিয়লি উত্তৰাখণ্ডৰ পিথোৰাগড়ত সংঘটিত পথ দুৰ্ঘটনাত ৮ গৰাকী লোকে প্ৰাণ হেৰুওৱাক লৈ শোক প্ৰকাশ কৰিছে। দুৰ্ঘটনাটোত চাৰিগৰাকী লোক গুৰুতৰভাৱে আহত হোৱাৰ বাতৰি আহিছে। প্রধানমন্ত্ৰীয়ে নিজৰ বাৰ্তাত আহতসকলৰ আশু আৰোগ্য কামনা কৰাৰ লগতে মৃতকৰ আত্মীয়লৈ সমবেদনা জ্ঞাপন কৰে। প্রধানমন্ত্ৰীয়ে লগতে প্রধানমন্ত্ৰী ৰাষ্ট্ৰীয় সাহায্য পুঁজিৰ পৰা প্ৰতিগৰাকী নিহত ব্যক্তিৰ আত্মীয়লৈ ২ লাখ টকাকৈ আৰু প্ৰতিগৰাকী আহত ব্যক্তিক ৫০ হাজাৰ টকাকৈ এককালীন সাহায্য প্রদান কৰা হ’ব বুলি ঘোষণা কৰে ৷
উল্লেখযোগ্য যে কালি বিয়লি পিথোৰাগড় জিলাৰ মুৱানি অঞ্চলৰ থাল পিথোৰাগড় পথৰ পৰা এখন বাহন নদীত পৰাৰ ফলত এই শোকাৱহ দুৰ্ঘটনাটো সংঘটিত হয়। ঘটনাটোত আহত লোকসকলক ততাতৈয়াকৈ নিকটৱৰ্তী চিকিৎসালয়ত ভৰ্তি কৰোৱা হয়। ৰাজ্যখনৰ মুখ্যমন্ত্ৰী পুষ্কৰ সিং ধামীয়ে ঘটনাটোক লৈ গভীৰ শোক প্ৰকাশ কৰে আৰু জিলা প্ৰশাসনক আহত লোকসকলৰ যথোচিত চিকিৎসা নিশ্চিত কৰিবলৈ নিৰ্দেশ দিয়ে।