অসমৰ ২০০ বছৰীয়া চাহ উদ্যোগৰ ইতিহাসত যুগান্তকাৰী পৰিৱৰ্তনৰ সূচনা কৰি কালি অসম বিধানসভাত চাহ বাগিচাৰ শ্ৰমিকক ভূমিৰ অধিকাৰ প্ৰদান সম্পৰ্কীয় এখন বিধেয়ক গৃহীত হয়। ভূমিৰ উৰ্ধসীমা নিৰ্ধাৰণ আৰু স্বত্বপ্রদান সংশোধনী বিধেয়ক ২০২৫ শীর্ষক এই বিধেয়কৰ জৰিয়তে বাগিচাৰ শ্ৰমিকসকলক ভূমিৰ অধিকাৰ প্ৰদানৰ ব্যৱস্থা কৰা হ’ব। ইয়াৰ ফলত ৩ লাখ ৩৩ হাজাৰৰো অধিক ভূমি স্বত্বহীন চাহ বাগিচাৰ শ্রমিকে ভূমি অধিকাৰ লাভ কৰিব। অৱশ্যে এই বিধেয়কত জলহা চাহ বাগিচাৰ শ্ৰমিকসকলক অন্তৰ্ভুক্ত কৰা হোৱা নাই। ইয়াৰ লগতে এই সংশোধনী বিধেয়কে অন্য কৃষি কার্যত জড়িত চাহ শ্রমিক জনগোষ্ঠীৰ লোকসকলক অন্তৰ্ভুক্ত কৰা নাই। উল্লেখযোগ্য যে, সম্প্ৰতি চাহ বাগিচাত কৰ্মৰত শ্ৰমিকসকলে স্পষ্ট আইনী অধিকাৰ নাইবা সাংবিধানিক সুৰক্ষা অবিহনে ভূমি দখল কৰি আছে। চাহ বাগিচাৰ কৰ্মী অথবা শ্রমিক হ’লেহে জনগোষ্ঠীটোৰ এজন ব্যক্তিক বাগিচাৰ এটা আৱাস গৃহ আৱণ্টন কৰা হৈছিল। পৰিয়ালৰ যিকোনো এজন ব্যক্তি বাগিচাত চাকৰি কৰি থাকিলেহে তেওঁলোকেহে সেই ঘৰপ্ৰাপ্তিৰ যোগ্যতা আৰহণ কৰিছিল। ইয়াৰ ফলত প্ৰজন্মৰ পাছত প্ৰজন্ম এটা শ্রমিক পৰিয়ালৰ সদস্যসকলে ভূমি অধিকাৰৰ কাৰণেই বাগিচাৰ চাকৰিৰ পৰা ওলাই আহিব পৰা নাছিল বুলি মুখ্যমন্ত্রী ড° শৰ্মাই কালি সদনত উল্লেখ কৰে। এই নতুন ভূমিপট্টা ব্যৱস্থাই তেওঁলোকক স্থায়ীভাৱে ভূমি বন্দোবস্তিত সহায় কৰিব বুলিও মুখ্যমন্ত্ৰীগৰাকীয়ে দাবী কৰে। তেওঁ লগতে কয়, যে ইয়াৰ ফলত স্থায়ীভাৱে গৃহ নিৰ্মাণ কৰাৰ লগতে ভূমি সম্পৰ্কত তেওঁলোকৰ অসুৰক্ষিত মনোভাব হ্ৰাস পাব মুখ্যমন্ত্ৰীয়ে কয়, যে ভূমিৰ পট্টা লাভ কৰাৰ পাছত এজন শ্ৰমিকে চাহ বাগিচাৰ ভূমি ২০ বছৰ পৰ্যন্ত বিক্ৰী কৰিব নোৱাৰিব। ২০ বছৰৰ পাছত ভূমি বিক্ৰী কৰিলেও সেয়া বাগিচাৰ আন শ্রমিককহে বিক্ৰী কৰিব পাৰিব বুলিও মুখ্যমন্ত্ৰীগৰাকীয়ে প্ৰকাশ কৰে।