অসমীয়া চলচ্চিত্ৰৰ একালৰ সুদৰ্শন নায়ক, খ্যাতনামা অভিনেতা, বিজু ফুকনৰ জন্ম বার্ষিকী উপলক্ষে আজি ৰাজ্যৰ বিভিন্ন প্ৰান্তত গুণমুগ্ধসকলে অভিনেতাগৰাকীৰ স্মৃতিত শ্রদ্ধা জ্ঞাপন কৰিছে। ডাঃ বেজবৰুৱা চলচ্চিত্ৰত এটা সৰু চৰিত্ৰৰে চলচ্চিত্ৰ জগতত ভূমুকি মৰা এইগৰাকী অভিনেতাই পাছলৈ বৰুৱাৰ সংসাৰ, আজলি নবৌ, আৰু বোৱাৰী চলচ্চিত্ৰত অভিনয়েৰে দৰ্শকৰ বিপুল সমাদৰ আৰু জনপ্ৰিয়তা লাভ কৰে।
৫০ খনৰো অধিক অসমীয়া চলচ্চিত্ৰত অভিনয়েৰে খ্যাতি অৰ্জন কৰা অভিনেতাগৰাকীৰ ভ্ৰাম্যমান থিয়েটাৰটো অভিনয় কৰি সুনাম অৰ্জন কৰিছে। অষ্টম দশকত চলচ্চিত্ৰ পৰিচালনাত হাত দিয়া বিজু ফুকনৰ দ্বাৰা পৰিচালিত ভাই ভাই চলচিত্ৰখনে বিপুল সফলতা অৰ্জন কৰিছিল। গুৱাহটী দূৰদৰ্শনৰ বাবে অভিনেতাগৰাকীয়ে ধাৰাবাহিকো পৰিচালনা কৰিছিল। ২০১৭ চনৰ ২২ নৱেম্বৰত তেওঁ শেষ নিশ্বাস ত্যাগ কৰে। কেন্দ্ৰীয় মন্ত্ৰী সৰ্বানন্দ সোণোৱালে সাৱলীল অভিনয়েৰে অসমীয়া চলচ্চিত্ৰ জগতক সমৃদ্ধ কৰা অভিনেতাগৰাকীৰ ওপজা দিনত তেওঁক শ্ৰদ্ধাৰে স্মৰণ কৰে। শিক্ষামন্ত্ৰী ডাঃ ৰণোজ পেগুৱে স্বনামধন্য অভিনেতাগৰাকীৰ প্ৰতি জন্মবার্ষিকীত শ্ৰদ্ধা নিবেদন কৰে।