বৰপেটা সত্ৰৰ বিখ্যাত দৌল মহোৎসৱৰ আজি সন্ধিয়া সামৰণি পৰে। এই মহোৎসৱৰ সামৰণিৰ দিনা আজি সমগ্ৰ বৰপেটা ফাকুৱাৰ ৰঙেৰে ৰঙীন হৈ পৰে। বিয়লি কলিয়া গোঁসাই তথা দৌলগোবিন্দ মহাপ্রভুক ভকতসকলে শোভাযাত্রা কৰি কলবাৰী সত্ৰলৈ লৈ যায়। সত্ৰত প্ৰতীকী ৰূপত হেকেটা মাহ খুওৱা পৰ্ব সম্পন্ন কৰাৰ পাছত গোঁসাইক পুনৰ বৰপেটা সত্ৰলৈ ওভতাই অনা হয়। সত্ৰ চৌহদত গোঁসাইক প্ৰবেশ কৰাৰ সময়তে পৰম্পৰাগতভাৱে বাঁহ ভঙা পর্ব অনুষ্ঠিত হয়। এই পৰ্বত লক্ষ্মী দেৱীৰ ভক্তসকলে গোঁসাইক সত্ৰত প্ৰবেশ কৰাত বাধা দিবলৈ প্ৰৱেশ পথত বাঁহ বান্ধি থোৱাৰ ৰীতি পালন কৰা হয়। গোঁসাইৰ ভক্তসকলে বাঁহ ভাঙি সত্ৰত প্ৰৱেশ কৰাৰ পাছত গোঁসাইক সত্ৰৰ মূল গৃহৰ চাৰিওদিশে সাত পাক প্ৰদক্ষিণ কৰোৱা হয়। ইয়াৰ পাছত পৰম্পৰাগতভাৱে বোলবুলনি নামৰ আন এক পৰ্ব অনুষ্ঠিত হয়। এই পৰ্বৰ অন্তত গোঁসাইক পুনৰ মণিকূট গৃহৰ আসনত অধিষ্ঠিত কৰোৱা হয়। দৌল মহোৎসৱৰ সামৰণিৰ কাৰ্যসূচীত অংশগ্ৰহণ কৰিবলৈ বৰপেটা সত্ৰত আজি লক্ষাধিক লোকৰ সমাগম হোৱা পৰিলক্ষিত হয়।