بھارتیہ جنتاپارٹی نے سپریم کورٹ اور چیف جسٹس آف انڈیا پر پارٹی کے پارلیمانی ارکان نشیکانت دوبے اور دنیش شرما کے متنازعہ بیانات کو قطعی طور پر مسترد کردیاہے اور خود کو ان بیانات سے الگ رکھا ہے۔ دونوں MPs کو اس طرح کے بیانات سے گریز کرنے کیلئے بھی کہاگیاہے۔ ایک سوشل میڈیا پوسٹ میں BJP صدر جے پی نڈا نے کہاکہ بھارتیہ جنتاپارٹی کا اس بیان سے کوئی تعلق نہیں ہے۔ انہوں نے کہا کہ یہ ذاتی بیانات ہیں اور BJP نہ ہی ان بیانات سے اتفاق کرتی ہے اور نہ ہی ایسے بیانات کی حمایت کرتی ہے۔

 انہوں نے مزید کہاکہ بھارتیہ جنتاپارٹی نے ہمیشہ ہی عدلیہ کا احترام کیاہے اور اس کے احکامات اور تجویزوں کو بخوشی قبول کیاہے۔

 جناب نڈا نے مزید کہا کہ پارٹی اس بات میں یقین رکھتی ہے کہ ملک کی سبھی عدالتیں ہماری جمہوریت کا اٹوٹ حصہ ہیں اور آئین کے تحفظ کے مضبوط ستون ہیں۔