विश्व स्वास्थ्य दिवस रे मौके प्रदेश मांय सोमवार ने निरामय राजस्थान अभियान सरू करी ज्यो। जयपुर मांय राख्यी ज्या राज्य स्तर रा कार्यक्रम मांय मुख्यमंत्री भजनलाल शर्मा इण री सरूआत कीनी। श्री शर्मा ईं सागे ई विकास रा पूरा व्ह्या 26 करोड़ रुप्या ऊं बत्ता खर्च वाळा काम जनता ने सूंप्या। वे 24 मोबाइल मेडिकल यूनिट अर 10 एडवांस लाइफ सपोर्ट एम्बूलेंस ने ई रवाना कीनी। कार्यक्रम मांय आयुष्मान आदर्श ग्राम पंचायत योजना, मिशन मधुहारी, मिशन लिवर स्माइल अर ईट राइट राजस्थान अभियान री ई सरूआत करी ज्यी। कार्यक्रम मांय मुख्यमंत्री जनता ऊं जीवण रो स्वस्थ तरीको अपनावण री अरज कीनी। वे कह्यो के दिनचर्या मांय छोटा-छोटा बदलाव कर र केई बीमारियां ऊं बचाव कर्यो जा सके है। मुख्यमंत्री कह्यो के स्कूली बच्चां मांय स्वास्थ्य रा बारा मांय जाग जगावण सारू प्राथमिक अर मिडिल स्कूलां रा कोर्स मांय स्वास्थ्य रा विषय जोड़्या जावेला। वे चिकित्सा कर्मचारियां ऊं समर्पित भाव सागे मरीज़ां री सेवा करण री अपील कीनी। ईं मौके चिकित्सा मंत्री गजेन्द्र सिंह खींवसर कह्यो के स्वास्थ्य रो ध्यान राखणो सगळा री प्राथमिकता व्हेवणी चाहिजे। विश्व स्वास्थ्य दिवस रे मौके प्रदेश मांय ई केई कार्यक्रम राख्यी ज्या। झुंझुनूं ज़िला रा चिड़ावा मांय डॉक्टरां रो मान करी ज्यो। पाली रा सरकारी बांगड़ अस्पताल मांय जागरुकता संगोष्ठी राख्यी ज्यी। बाड़मेर ज़िला रा आगोर मांय स्कूली विद्यार्थियां ने स्वास्थ्य री देखभाल सारू चोखी आदतां अपनावण री शपथ दिरायी ज्यी। सवाईमाधोपुर रा सरकारी सफाखाना मांय मुफ़्त स्वास्थ्य जांच रो शिविर लगायी ज्यो। विश्व स्वास्थ्य दिवस रे मौके प्रधानमंत्री नरेंद्र मोदी स्वस्थ दुनिया बणावण सारू संकल्प जतायो। श्री मोदी वां रा संदेश मांय कह्यो के चोखो स्वास्थ्य हर सम्पन्न समाज री नींव है।