राज्य मांय चौमासा ऊं पैली री बिरखा व्हेवण ऊं पारो उतर्यो है। सोमवार ने कठे ऊं ईं लू बाजण रा समाचार नी मिल्या। मौसम विभाग रे मुजब सोमवार ने कोटा, उदयपुर, भरतपुर, अजमेर अर जयपुर संभाग रा ग्यारह ज़िलां मांय भारी बारिश रा आसार है जदके जोधपुर अर बीकानेर संभाग रा कुछ ज़िलां मांय हल्की ऊं मझला दर्जा री बरसात री संभावना है। लारला चौबीस घंटां मांय राजसमंद, अलवर, भरतपुर, अजमेर, कोटा, जोधपुर, पाली अर जालौर मांय चोखो मेह बरस्यो। राजसमंद ज़िला रा आमेट मांय सब ऊं बत्ती 10 सेंटीमीटर बिरखा व्ही। झालावाड़ अर कोटा मांय ज़बरदस्त उमस पाछे बिरखा व्ही। भीलवाड़ा मांय रिमझिम बारिश व्हेवण सागे सीळो बायरो बाज्यो। कोटा मांय आधा घंटा तांई झमाझम बिरखा व्ही। बारां ज़िला रा किशनगंज, नाहरगढ, अटरू अर मांगरोल मांय ई चोखो मेह बरस्यो। अटरू हलका रा मायथा भेरूजी मांय बीजळी पड़ जावण ऊं दो जणां री मौत व्हे ग्यी अर दो जणा घणा झुलस ग्या। हनुमानगढ़ ज़िला मांय पीलीबंगा हलका रा दुलवाना गांव मांय नहर मांय डूब जावण ऊं सोमवार ने एक ही पिरवार रा 3 बच्चां री मौत व्हे ग्यी। राजसमंद ज़िला मांय देवगढ़ कने स्वादड़ी गांव मांय घर कने पाणी भर्या खाड़ा मांय डूब जावण ऊं दो बच्चां री मौत व्हे ग्यी।