मुख्यमंत्री भजनलाल शर्मा कह्यो है के किसानां रे मजबूत बणबा ऊं ई प्रदेश ताकतवर बणेला। वे मंगलवार ने हनुमानगढ़ मांय जनसभा ने संबोधित कर रह्या हा। श्री शर्मा कह्यो के किसानां ने पाणत सारू जरूरी पाणी मुहैया करावण बाबत् न्यारी-न्यारी नहर परियोजनावां ने मज़बूत बणावण रो फैसलो करी ज्यो है। वे कह्यो के इन्दिरा गांधी नहर परियोजना ने और चोखी बणावण सारू 3 हजार 400 करोड़ रुप्या रा काम कराया जावेला। मुख्यमंत्री कह्यो के ईं सागे ई भाखड़ा अर गंग नहर ऊं जुड़ी समस्यावां आगी करण सारू ई ज़रूरी काम कर्या जावेला। मुख्यमंत्री आज पंजाब मांय न्यारा-न्यारा नहर हलकां रो हवाई दौरो कीनो। श्री शर्मा हेरिके हैड मांय मल्लेवाला हैड, बल्लेवाला हैड, बीकानेर कैनाल, फिरोजपुर फीडर अर इंदिरा गांधी नहर रो जायज़ो लीनो। ईं दौरान मुख्यमंत्री पाणत ऊं जुड़ी न्यारी-न्यारी परियोजनावां रा हालात अर पाणी रा बहाव रा बूता रा बारा मांय ई जाणकारी लीनी। श्री शर्मा हरियाणा रा लोहगढ़ बंधा रो ई जायज़ो लीनो। वे बांध रा हालात अर पाणी भेळो करण रा बूता समेत न्यारा-न्यारा पहलुआं री जाणकारी लीनी। जल संसाधन मंत्री सुरेश सिंह रावत ई वां सागे हा। मुख्यमंत्री रो काल श्रीगंगानगर ज़िना रा दौरा रो कार्यक्रम है। वे नुवी धान मंडी मांय सरकारी मोल माथे सरसों री खरीद रा काम री सरूआत करेला।