भाजपा रा सज़ायाफ्ता विधायक कंवर लाल मीणा री विधानसभा सदस्यता रद्द कर दीरीजी है। श्री मीणा बारां ज़िला री अंता सीट चुणी ज्या हा। विधानसभा अध्यक्ष वासुदेव देवनानी मीणा रे मनोहरथाना री अदालत मांय समर्पण पाछे ओ हुकम दीनो। विधानसभा सचिवालय री ओर ऊं ईं बारा मांय शुक्रवार ने अधिसूचना जारी कर दीरीजी। ध्यानजोग है कि साल 2005 मांय सरपंच रा चुनाव रे दौरान वां बगत रा एस.डी.ओ. ने पिस्तौल बता र धमकावण रा मामला मांय विधायक मीणा ने अदालत 3 साल री सज़ा सुणायी ही। ईं रे खिलाफ़ सुप्रीम कोर्ट मांय दाखिल करी ज्यी अर्जी खारिज़ व्ह्यां पाछे श्री मीना मनोहरथाना मांय समर्पण कर दीनो हो। वे अंता विधानसभा हलका ऊं कांग्रेस रा प्रमोद जैन भाया ने हरा र विधायक बण्या हा। श्री मीणा मनोहरथाना ऊं ई विधायक रह्या हा। कंवर लाल मीणा री विधानसभा सदस्यता निरस्त व्ह्यां पाछे अब बारां ज़िला री अंता सीट खाली व्हे ग्यी है अर राज्य विधानसभा मांय अब 199 सदस्य रह ग्या है। खबरनवीसां सागे बातचीत करता थकां विधानसभा अध्यक्ष कह्यो के महाधिवक्ता री रपट मिलता ही ओ फैसलो करी ज्यो। श्री देवनानी कह्यो के ईं मामला मांय सियासत नी व्हेवणी चाहिजे।