देश मांय विकसित कृषि संकल्प अभियान चलायो जावेला। केन्द्रीय कृषि मंत्री शिवराज सिंह चौहान सोमवार ने नई दिल्ली मांय खबरनवीसां सागे बातचीत करता थकां बतायो के 29 मई ऊं 12 जून तांई चलाया जावण वाळा ईं अभियान रो मकसद किसानां ने खेती-बाड़ी ऊं जुड़ी बेहतर तकनीकां अर बीजां रा बारा मांय जाणकारी देवणो है। श्री सिंह कह्यो के देशभर रा 723 ज़िलां मांय चलाया जावण वाळा ईं अभियान ऊं करीब डोढ़ करोड़ किसानां ने फ़ायदो व्हेला। श्री चौहान बतायो के कृषि वैज्ञानिकां रा दल करीब 65 हजार गांवां मांय जा र काश्तकारां ने वैज्ञानिक तरीका ऊं खेती-बाड़ी रा बारा मांय व्यावहारिक जाणकारी देवेला। केन्द्रीय कृषि मंत्री वीडियो कान्फ्रेंसिंग रे मार्फत सगळा राज्यां रा कृषि मंत्रियां ने ईं अभियान री जाणकारी दीनी। राज्य रा कृषि मंत्री डॉ. किरोड़ी लाल मीणा ई ईं मीटिंग मांय सिरकत कीनी। वे ईं अभियान रा तहत् किसानां ने उद्यानिकी रा काम रा बारा मांय ई जाणकारी देवण री राय दीनी।