टोंक मांय सदर थाना हलका रा जूना पुल कने बनास नदी मांय डूब जावण ऊं मंगलवार ने आठ नौजवानां री मौत व्हे ग्यी। मरण वाळा सगळा नौजवान जयपुर रा रेहवासी हा। टोंक रा एस.पी. विकास सांगवान आकाशवाणी ने बतायो के हादसो दोपेरां री बगत व्ह्यो जद 11 गोठ मनावण सारु बनास नदी कने पूग्या नौजवान नदी मांय नहावण सारु उतर्या। ईं पाछे कुछ लोग पाणी मांय बेहवण लाग्या, ज्यां ने बचावण सारु दूजा जणा ई पाणी मांय उतर्या अर हादसा री फेंट मांय आ ग्या। एस.पी. बतायो के हादसा री जाणकारी मिलतां ई पुलिस अर प्रशासन री टीम मौके पूग र बचाव रा काम सरु कर दीना अर तीन जणां ने बचा लिया ज्या। राज्यपाल हरिभाऊ बागड़े अर मुख्यमंत्री भजन लाल शर्मा हादसा माथे दुःख जतायो है। पैली वाळा उपमुख्यमंत्री सचिन पायलट ई हादसा ने घणो दुःख देवण वाळो बतायो।