राज्य स्तर रो आरोग्य मेळो आरोग्यम-2025 थावर ने जयपुर रा जवाहर कला केंद्र मांय सरु व्हेला। 4 मार्च तांई चालण वाळा ईं मेळा मांय  आयुर्वेद, होम्योपैथी, यूनानी, योग और नेचुरोपैथी तरीकां ऊं बीमारियां रा ईलाज सारु राय दी जावेला। उपमुख्यमंत्री अर आयुष मंत्री डॉ. प्रेम चंद बैरवा शुक्रवार ने खबरनवीसां ने आ जाणकारी दीनी। वे कह्यो के मेळा रे मार्फत लोगां ने ईलाज रा आयुष तरीकां रा असर अर स्वस्थ्य जीवनशैली रा बारा मांय जाणकारी दी जावेला। श्री बैरवा बतायो के  ईं दौरान ईलाज रा भांत-भांत रा तरीकां रा दरसाव सागे रोजीना  योगाभ्यास ई करवायो जावेला। आयुष मंत्री खबरनवीसां ने महकमा रा लारला एक साल रा कामां अर उपलब्धियां री जाणकारी ई दीनी। वे कह्यो के महकमा मांय मोटी तादाद मांय भर्तियां करी जा रही है। श्री बैरवा बतायो के राइजिंग राजस्थान रा तैत आयुष विभाग मांय निवेश रा ई केई प्रस्ताव मिल्या है, ज्यां माथे काम कर्यो जा रह्यो है।