ऑपरेशन सिंदूर री कामयाबी माथे प्रदेशभर मांय उमाव रो माहौल है। न्यारी-न्यारी ठोडां सैनिकां रा सनमान मांय तिरंगा यात्रावां निकाळी जाय री है। इण मांय घणी तादाद मांय लोग हिस्सो ले रिया है। ई कडी मांय पाली, जालौर अर जैसलमेर मांय रविवार ने तिरंगा यात्रा निकाळी ज्यी। सामाजिक न्याय अर अधिकारिता मंत्री अविनाश गहलोत अर पशुपालन अर डेयरी राज्यमंत्री जोराराम कुमावत, पाली मांय तिरंगा यात्रा मांय भेळा व्ह्या। ईं मौके केबिनेट मंत्री अविनाश गहलोत कह्यो के सेना रा शौर्य माथे देशभर मांय मान जतायो जा रियो है। उठी ने अजमेर मांय रविवार ने तिरंगा यात्रा निकाळी ज्यी। ई जातरा मांय विधानसभा अध्यक्ष वासुदेव देवनानी, केन्द्रीय किसान कल्याण राज्यमंत्री भागीरथ चौधरी अर जल संसाधन मंत्री सुरेश सिंह रावत समेत केई जन नुमाइंदा अर लोग भेळा व्हीया। भरतपुर मांय सोमवार ने तिरंगा रैली निकाळी जाएला। आ रैली शहर रा खास मार्गां ऊं व्हेता लक्ष्मण मंदिर चौक तांई पूगेला। सवाईमाधोपुर मांय 21 मई ने निकाळी जावण वाळी जातरा ने लेर रविवार ने तैयारी बैठक व्ही।