अमेरिका रा उप राष्ट्रपति जे.डी. वेन्स कह्यो है के ईं सदी रो आवतो बगत भारत अर अमेरिका रा कारोबारी रिश्तां माथे निर्भर करे है। वे मंगलवार ने जयपुर मांय राख्यी ज्या कारोबारी सम्मेलन मांय बोल रह्या हा। अमेरिका रा उप राष्ट्रपति कह्यो के अमेरिका अर भारत कारोबार ऊं जुड़ी बातचीत सारू आधिकारिक तौर ऊं शर्तां तैय कीनी है, जो दोन्यू देशां बीचे रोडमैप तैयार करे है। श्री वेन्स कह्यो के अमेरिका रा राष्ट्रपति डोनाल्ड ट्रंप री टैरिफ पॉलिसी री आलोचना करी जा रही है, जद के वे संतुलित कारोबार रो माहौल बणायो है। वे कह्यो के भारत रक्षा हलका मांय अमेरिका रो सब ऊं नजदीकी अर भरोसेमंद साझेदार है। उप राष्ट्रपति जे.डी. वेन्स कह्यो के अमेरिका भारत ने हिफाज़त ऊं जुड्या विश्व स्तर रा साज-ओ-सामान देवण री मंशा राखे है अर भारत अर अमेरिका बीचे ऊर्जा रा हलका मांय भागीदारी री घणी संभावनावां हैं। श्री वेन्स भारत मांय नुवा घर बणावण अर जीवन स्तर बेहतर बणावण सारू सुबीता विकसित करण रा हलका मांय ई भागीदारी माथे ज़ोर दीनो।
उप राष्ट्रपति वेन्स मंगलवार ने भारतीय मूल री जोड़ायत उषा चिलुकुरी वेन्स अर तीन बच्चां सागे जयपुर कने आमेर रा किला अर दूजी ऐतिहासिक ठोड़ां रो दौरो कीनो अर वां ने निरख्या। वे आं री सुंदरता अर वास्तुकला री सराहवणा कीनी। आमेर पूगण परां वां रो परम्परागत राजस्थानी अंदाज मांय स्वागत करी ज्यो। आमेर महल मांय मुख्यमंत्री भजनलाल शर्मा अर उपमुख्यमंत्री दिया कुमारी अमेरिका रा उपराष्ट्रपति री अगुवानी कीनी। श्री वेन्स रो राज्यपाल हरिभाऊ बागड़े, मुख्यमंत्री भजन लाल शर्मा अर उद्योग मंत्री कर्नल राज्यवर्द्धन राठौड़ सागे ई मुलाकात रो कार्यक्रम है। श्री वेन्स रो बुधवार ने पिरवार सागे आगरा जावण अर दोपहरां तांई पाछा जयपुर आवण रो कार्यक्रम है।