79 वों स्वतंत्रता दिवस शुक्रवार ने उमाव सागे मणायो जावेला। प्रधानमंत्री नरेन्द्र मोदी दिल्ली रा लाल किला माथे राख्या जावण वाळा जळसा मांय तिरंगो झंडो फहरा र जनता ने संबोधित करेला। ईं साल स्वतंत्रता दिवस समारोह रो मुद्दो “नया भारत“ राख्यी ज्यो है। लाल किला माथे राख्या जावण वाळा जळसा मांय शामिल व्हेवण सारु देशभर ऊं न्यारा-न्यारा हलकां मांय बेहतरीन काम करण वाळा करीब पाँच हज़ार खास पावणां ने न्यौतो दियो ज्यो है। जनता मांय देशभक्ति री भावना ने बधावो देवण अर ऑपरेशन सिंदूर मांय जीत रो जश्न मनावण सारु शुक्रवार ने सिंज्या आखा देश मांय 140 ठौड़ां बैंड प्रस्तुतियाँ रा कार्यक्रम राख्यी ज्या है। स्वतंत्रता दिवस रे मौके सरहद रा 16 पहरेदारां ने ऑपरेशन सिंदूर रे दौरान बतायी ज्यी हिम्मत सारु वीरता पदक दे र नवाज़ा जावेला। स्वतंत्रता दिवस रे मौके पुलिस, अग्निशमन, होमगार्ड, नागरिक सुरक्षा अर सेवावां रा एक हजार नब्बे कर्मचारियां ने वीरता अर सेवा पदक दे र नवाजी ज्या। गृह मंत्रालय रे मुजब 233 कर्मचारियां ने वीरता पदक, 99 कर्मचारियां ने विशिष्ट सेवा सारू राष्ट्रपति पदक अर 758 कर्मचारियां ने सराहनीय सेवा पदक दे र नवाजी ज्या। आं मांय राजस्थान रा 18 पुलिस वाळा ई शामिल है। विशिष्ट सेवा सारू राजस्थान पुलिस मांय कम्पनी कमाण्डर भंवर सिंह अर सब इन्सपेक्टर नरेन्द्र सिंह रो राष्ट्रपति पदक दे र मान करी ज्यो जद के 16 पुलिस वाळां ने मेधावी सेवा पदक दे र नवाज़ी ज्या। राज्य स्तर रो स्वतंत्रता दिवस समारोह जोधपुर मांय राख्यो जावेला। मुख्यमंत्री भजनलाल शर्मा बरकतउल्लाह खां स्टेडियम मांय झंडो फहरा र प्रदेश री जनता ने सम्बोधित करेला। कार्यक्रम मांय प्रदेश रा 11 प्रशासनिक अहलकारां रो खास सेवावां सारू मान कर्यो जावेला। इण ऊं पैली गुरूवार ने जोधपुर रा मेहरानगढ़ किला मांय एट होम कार्यक्रम राख्यी राख्यी ज्यो। इण मांय मुख्यमंत्री भजनलाल शर्मा, केई कैबिनेट मंत्रियां, विधायकां अर आला अहलकारां समेत करीब तीन सौ प्रबुद्धजन शामिल व्ह्या। कार्यक्रम मांय 14 पुलिस वाळां ने ध्यानजोग काम सारू नवाज़ा जावेला। अतिरिक्त पुलिस महानिदेशक वी.के. सिंह रो राष्ट्रपति पुलिस पदक दे र मान कर्यो जावेला। ईं सागे ई न्यारा-न्यारा हलकां मांय बेहतरीन काम करण वाळा 4 जणां अर 1 ग्राम पंचायत ने ई मान-पाना दे र नवाज़ा जावेला। एट होम कार्यक्रम पाछे मेहरानगढ़ ऊं ई ऑपरेशन सिंदूर थीम माथे ड्रोन शो मांय साढे पांच सौ ड्रोन एके सागे उडे़ला। ईं दौरान फौज री शौर्य गाथा अर मेक इन इंडिया रा तैत बणायी ज्या बेहतर हथियारां रो दर्शाव ई कर्यो जावेला। आजादी री वर्षगांठ प्रदेश रा न्यारा-न्यारा ज़िलां मांय ई हरख-उमाव सागे मणायी जावेला। ज़िला स्तर रा कार्यक्रमां मांय प्रभारी मंत्री, संभागीय आयुक्त अर ज़िला कलेक्टर तिरंगां झण्डो फहरा र मार्चपास्ट री सलामी लेवेला। न्यारा-न्यारा संगठनां अर सामाजिक अर शैक्षणिक संस्थावां मांय ई आज़ादी रो जश्न उमाव सागे मणायो जावेला। ईं बीचे सगळी सरकारी इमारतां, स्मारकां अर ऐतिहासिक इमारतां ने सोहवणी रोशनी ऊं सजायी ज्यी है। म्हाणा चित्तौड़गढ़ बतायो के किला री भींतां, विजय स्तम्भ अर कुम्भा पैलेस ने तिरंगी रोशनी ऊं सजायी ज्या है। आ सजावट 17 अगस्त तांई राख्यी जावेला।