78 वां सेना दिवस रे मौके गुरूवार ने जयपुर मांय शानदार परेड राख्यी ज्यी। जगतपुरा रा महल रोड माथे राख्यी ज्यी परेड मांय भारत री फौज री बहादुरी अर नुवा जमाना रो फौजी बूतो निजर आयो। ओ पहलो मौको है जद सेना परेड फौजी छावनी रे बाहर जनता बीचे राख्यी ज्यी। परेड सरू व्हेवण ऊँ पैली सेना प्रमुख जनरल उपेंद्र द्विवेदी देश री हिफाज़त सारू जन कुर्बान कर देवण वाळा वीर जवानां रा पिरवार वाळां ने सेना मेडल दे र नवाज़ी ज्या। परेड रे दौरान जवानां री अनुशासित टुकड़ियां सलामी मंच सामी ऊँ निकळता थकां वीरता अर पेशेवर बूता रो दरसाव कीनो। कार्यक्रम मांय फौज रा लड़ाई रा नुवा ज़माना रा बूता रो बेहतरीन दरसाव करी ज्यो। परेड ने निरखण सारू राज्यपाल हरिभाऊ बागड़े, मुख्यमंत्री भजन लाल शर्मा, राज्य मंत्रिमंडल रा सदस्य, फौज रा आला अहलकार अर मोटी तादाद मांय जनता मौजूद रही। म्हाणा खबरनवीस बतायो के परेड मांय खुद रे पाण ऊबा भारत री झलक निजर आयी। परेड पाछे खबरनवीसां सागे बातचीत करता थकां सेना प्रमुख जनरल उपेंद्र द्विवेदी कह्यो के भारत री फौज मौजूदा चुनौतियां सागे आवता बगत री जरूरतां रा आधार ऊँ तैयारी कर रही है। जनरल द्विवेदी कह्यो के इण ने ध्यान राखता थकां केई नुवी इकाइयां बणायी ज्यी है, ज्यां री झलक परेड मांय देखण ने मिली। वे कह्यो के खुद रे पाण ऊबो व्हेवणो लक्ष्य नी है बल्कि रणनीतिक ज़रूरत बण ग्यो है। सेना दिवस रे मौके गुरूवार ने सिंज्यां जयपुर रा सवाई मानसिंह स्टेडियम मांय शौर्य संध्या राख्यी ज्यी है, जिण मांय रक्षामंत्री राजनाथ सिंह ई शामिल व्हे रह्या है। कार्यक्रम मांय मुख्यमंत्री भजन लाल शर्मा कह्यो के राजस्थान री वीर धरा मातृभूमि री हिफाजत सारू हमेशा आगे रही है। श्री शर्मा कह्यो के प्रदेश रा हर गांव अर कस्बा रा नौजवानां मांय फौज मांय शामिल व्हे र देश री सेवा करण रो जज़्बो अर सपनो निजर आवे है। मुख्यमंत्री कह्यो के राज्य सरकारी फौजियां अर वां रा पिरवार वाळां रा भला सारू लगातार काम कर रही है। इण ऊँ पैली रक्षा मंत्री राजनाथ सिंह जयपुर रा फौजी टेशन मांय सेना रा जवानां सागे बातचीत कीनी। ई मौके वे कह्यो के देश री सरहद री हिफ़ाजत मांय फौजी जवानां रो खास काम है अर पूरो देश फौज सागे मजबूती ऊँ ऊबो है।