76 वों राज्य थर रो वन महोत्सव दीतवार ने जयपुर मांय जगद्गुरु रामानंदाचार्य राजस्थान संस्कृत विश्वविद्यालय मांय व्ह्यो मुख्यमंत्री भजन लाल शर्मा इण मांय सिरकत करी। वणा ई मौके विश्वविद्यालय परिसर मांय हरियाळो राजस्थान अभियान रे तैत सिंदूर रो पौधो लगायो अर ड्रोन री मार्फत बीजा रोप्या। ईं मौके श्री शर्मा ने प्रदेश ने खुशहाल बणावण सारू सगळा ऊं एक पेड़ मॉ के नाम जरूर लगावण री अरज करी। मुख्यमंत्री महोत्सव मांय वन्यजीव संरक्षण अर हिफ़ाजत सारू ठावां काम करण वाळां ने “अमृता देवी विश्नोई स्मृति पुरस्कार दे र सम्मानित कर्या। इण रे पछे श्री शर्मा सीकर ज़िला रा मण्डावरा गांव मांय वृक्षा रोपण कार्यक्रम मांय भेळा व्ह्या। कार्यक्रम मांय बोलता वन मंत्री संजय शर्मा बतायो के राज्य मांय ईं साल दस करोड़ पौधा लगावण रो लगस राख्यी ज्यो है जिण मांय ऊं अजै तांई साढे पांच करोड़ पौधा लगाया जा चुक्या है। हरियाळो राजस्थान अभियान रे तैत राज्य रा न्यारा-न्यारा ज़िला मांय ई प्रभारी मंत्रियां पौध रोपण कार्यक्रमां मांय हिस्सो लियो। कोटपूतली-बहरोड़ जिला रा नीमराणा मांय केन्द्रीय वन अर पर्यावरण मंत्री भूपेन्द्र यादव वन महोत्सव मांय सिरकत करी। वणा पढे़सरा ऊं बतळ करता पर्यावरण संरक्षण री जरूरत माथे जोर दियो। अजमेर मांय विधानसभा अध्यक्ष वासुदेव देवनानी ज़िला थर रा वृक्षारोपण कार्यक्रम री सरूआत करी।