21 जून ने मनायो जावण वाळो अंतर्राष्ट्रीय योग दिवस ज्यों-ज्यों नजदीक आ रह्यो है त्यों-त्यों शहरां अर गांवां मांय प्रोटोकॉल अभ्यास कर्यो जा रह्यो है। आयुष मंत्रालय री ओर ऊं काल नई दिल्ली मांय योगा कनेक्ट वैश्विक सम्मेलन राख्यो जावेला। विज्ञान भवन मांय व्हेवण वाळा ईं सम्मेलन मांय देश-परदेश रा योग गुरू, नीति निर्माता, स्वास्थ्य विशेषज्ञ, शोध करण वाळा अर सोशल मीडिया इन्फ्लुएंसर्स शिरकत करेला। राज्य मांय ई पाली अर हनुमानगढ़ ज़िलां मांय न्यारी-न्यारी ठोड़ां शिविर लगा र काउंट डाउन योगाभ्यास रा आयोजन कर्या जा रह्या है। हनुमानगढ़ मांय अ शिविर 30 जून तांई लगाया जावेला। ईं दौरान आयुर्वेद विभाग योगाभ्यास सागे ईलाज रा देशी तरीकां अर आयुर्वेद रे प्रति जाग जगा रह्यो है। 16 जून ने विधानसभा परिसर मांय योगाभ्यास रो कार्यक्रम राख्यी ज्यो है। विधानसभा अध्यक्ष वासुदेव देवनानी री मौजूदगी मांय विधायक अर विधानसभा रा कर्मचारी अर अहलकार न्यारा-न्यारा आसनां रो अभ्यास करेला। श्री देवनानी योग ने सनातन री महान विरासत बताता थकां कह्यो के इण ने आमजन री जिन्दगी रो अटूट हिस्सो बणावणो व्हेला। वे कह्यो के योग भारत री देन है अर मौजूदा दौर मांय 193 देशां मांय योग दिवस मनायो जा रह्यो है। अंतर्राष्ट्रीय योग दिवस रा सिलसिला मांय आकाशवाणी जयपुर रा क्षेत्रीय समाचार एकांश री ओर ऊं संदेश श्रृंखला चलायी जा रही है। जयपुर रा आयुर्वेद कॉलेज मांय योग री विभागाध्यक्ष डॉ. गुंजन गर्ग रो कह्वणो है के भागम-भाग री ज़िंदगी मांय तनाव ऊं बचाव मांय योग मददगार है।