15 अगस्त ने मनाया जावण वाळा स्वतंत्रता दिवस ऊं पैली देशभर मांय जोर-शोर ऊं हर घर तिरंगा अभियान चलायो जा रह्यो है। गृह मंत्री अमित शाह आज नई दिल्ली मांय वां रा रेहवास माथे तिरंगो झण्डो फहरायो। मुख्यमंत्री भजनलाल शर्मा ई बुधवार ने जयपुर मांय वां रा रेहवास माथे तिरंगो झण्डो फहरायो। ईं मौके वे बत्ती ऊं बत्ती जनता ऊं ईं अभियान ऊं जुड़बा री अरज कीनी। मुख्यमंत्री रो गुरूवार ने बीकानेर रा नाल मांय निकाळी जावण वाळी तिरंगा यात्रा मांय शामिल व्हेवण रो कार्यक्रम है। इण ऊं पैली बुधवार ने केंद्रीय मंत्री अर्जुनराम मेघवाल बीकानेर रा गंगा शहर मांय निकाळी ज्यी तिरंगा यात्रा मांय शामिल व्ह्या। जयपुर मांय केन्द्रीय संचार ब्यूरो अर वायु सेना टेशन री ओर ऊं जल महल री पाल ऊं आमेर महल तांई तिरंगा रैली निकाळी ज्यी। केन्द्रीय संचार ब्यूरो राजस्थान री अपर महानिदेशक ऋतु शुक्ला बतायो के मोटरसाइकिल रैली मांय लोग जोश अर जज़्बा सागे हिस्सो लीनो। जयपुर वायुसेना टेशन रा ग्रुप कैप्टेन विनय भारद्वाज कह्यो के हर घर तिरंगा अभियान देशभक्ति रो जज्बो महसूस करावे है। नागौर, सलूंबर, बाड़मेर, अलवर, कोटपूतली-बहरोड़, सवाईमाधोपुर बारां, पाली अर सिरोही समेत केई ठोड़ां निकाळी ज्यी तिरंगा रैलियां अर दूजा कार्यक्रमां मांय लोग उमाव सागे भाग लीना।