13 मई 2008 मांय जयपुर मांय एके-पाछे-एक आठ बम धमाकां पाछे और ज़िन्दा बम मिलण रा मामला मांय अदालत मांय दोषी साबित व्ह्या चार आतंकियां ने आजीवन कारावास री सज़ा सुणायी ज्यी है। ईं मामला री सुणवाई कर रही खास अदालत रा जज रमेश कुमार जोशी 600 पेज रा फैसला मांय सैफुर्रहमान, मोहम्मद सैफ, मोहम्मद सरवर आजमी अर शाहबाज अहमद ने दोषी ठहराया। दोषियां ने सज़ा देवण रा बारा मांय व्ही बहस रे दौरान सरकारी वकील सागर तिवाड़ी अदालत मांय दोषियां ने बच्योड़ी ज़िन्दगी तांई जेल मांय ही राखण री मांग कीनी। वे कह्यो के ओ घणो गंभीर अपराध है अर ऐड़ा अपराधियां सागे किण ई हालात मांय नरमी नी बरती जावणी चाहिजे। अदालत रा फैसला पाछे सरकारी वकील खबरनवीसां ने बतायो के कोर्ट ईं मामला ने घाणो गंभीर मानता थकां आतंकवाद ने समाज सारू खतरो बतायो। ध्यानजोग है के जीवतो बम चांदपोल बाज़ार रा एक गेस्ट हाउस कने मिल्यो हो, जिण ने धमाका ऊं महज़ 15 मिनट पैली बेकार कर दियो ज्यो हो। आं धमाकां रे कारण 71 जणां री मौत व्हे ग्यी ही अर 185 जणा ज़ख्मी व्हे ग्या हा।