11वों अन्तर्राष्ट्रीय योग दिवस मनावण सारू देश-दुनिया मांय मोटा पैमाना माथे तैयारियां करी जा रही है। इंर् साल योगा फॉर वन अर्थ-वन हैल्थ मुद्दा माथे मनाया जावण वाळा योग दिवस रा काउंटडाउन कार्यक्रम रा तैत केई दिनां ऊं सामूहिक योगाभ्यास, योग शिविर अर जागरूकता कार्यक्रम चाल रह्या है। प्रदेश मांय राख्या जा रह्या कार्यक्रमां री बानगी बाग-बगीचां, न्यारा-न्यारा संस्थानां, दफ्तरां, धार्मिक अर सैर-सपाटा री ठौड़ां निजर आ रही है। आं ठौड़ां 21 जून ने मनाया जावण वाळा अंतर्राष्ट्रीय योग दिवस रा काउंटडाउन कार्यक्रम राख्या जा रह्या है। आं मांय हर उम्र रा लोगां री भागीदारी निजर आ रही है। सरहदी ज़िला जैसलमेर रा रेतीले धोरां मांय अर सरहदी चौकियां माथे न्यारी-न्यारी योग मुद्रावां रो अभ्यास करता जवान मनोहारी नज़ारो पेश कर रह्या है। पाली अर अजमेर समेत न्यारी-न्यारी ठौड़ां भेळा योगाभ्यास सत्र अनुशासन अर एकजुटता रो संदेश दे रह्या है। भारत रो दुनिया ने ओ अनोखो उपहार योग, शांति अर भाईचारा रो आधार बण रह्यो है। क्षेत्रीय समाचार एकांश री ओर ऊं योग जागरूकता रा बारा मांय चलायी जा रही श्रृखला मांय आज सुणो सा योग री सिखावण देवण वाळी मेघना सोती रो संदेश।