11वां अंतर्राष्ट्रीय योग दिवस उत्सव री धूम दुनियाभर मांय निज़र आ रही है। ओ दिन डोढ़ सौ ऊं बत्ता देशां मांय मनायो जावेला अर करोड़ां लोगां रे इण ऊं जुड़बा रा आसार है। प्रदेश मांय ई न्यारा-न्यारा कार्यक्रमां रे जरिये योग ने रोजमर्रा रो हिस्सो बणावण री प्रेरणा दी जा रही है। इण ई रा तैत भेळा योगाभ्यास अर जागरुकता कार्यक्रमां रो सिलसिलो चाल रह्यो है। मंगलवार ने बाड़मेर री रिज़र्व पुलिस लाईन मांय जवानां सारू योग अभ्यास रो कार्यक्रम राख्यी ज्यो। अंतर्राष्ट्रीय योग दिवस रा सिलसिला मांय आकाशवाणी जयपुर रा क्षेत्रीय समाचार एकांश री ओर ऊं संदेश श्रृंखला चलायी जा रही है। जोधपुर री योग प्रशिक्षक कीर्ति चौरड़िया रो कहवणो है के योग री सरूआत बचपन ऊं करणी चाहिजे।