11वां अंतर्राष्ट्रीय योग दिवस रे मौके प्रदेश मांय न्यारी-न्यारी ठोड़ां योगाभ्यास रा कार्यक्रम राख्या जावेला। राज्य स्तर रो खास कार्यक्रम जयपुर रा सवाईमानसिंह स्टेडियम मांय राख्या जावेला, जठे स्कूल-कॉलेज रा विद्यार्थी, जनता अर मोटी तादाद मांय सरकारी अहलकार अर कर्मचारी न्यारा-न्यारा योगासनां अर प्राणायाम रो अभ्यास करेला। ईं दिन न्यारा-न्यारा स्मारकां, खास इमारतां अर धरोहरां माथे ई योग रा कार्यक्रम राख्या जावेला। प्रदेश रो सगळा ज़िलां मांय प्रभारी मंत्रियां री अगुवाई मांय योग प्रोटोकॉल रा तैत अभ्यास कर्यो जावेला। अंतर्राष्ट्रीय योग दिवस रे मौके जयपुर रा राष्ट्रीय आयुर्वेद संस्थान री ओर ऊं ऐतिहासिक जंतर मंतर सामी ‘‘योग संगम‘‘ कार्यक्रम राख्यो जावेला। संस्थान रा कुलपति प्रो. संजीव शर्मा गुरूवार ने खबरनवीसां ने बतायो के ईं खास आयोजन मांय देश रा न्यारा-न्यारा राज्यां ऊं आ र राष्ट्रीय आयुर्वेद संस्थान मांय पढ़ रह्या विद्यार्थियां सागे दूजा देशां रा विद्यार्थी ई शिरकत करेला। ओ कार्यक्रम संवारे छह बज्यां सरू व्हेला। प्रोफेसर शर्मा बतायो के संस्थान री ओर ऊं योग दिवस ऊं एक सौ दिन पैली ऊं ई लगातार भांत-भांत रा कार्यक्रम राख्या जा रह्या है। राष्ट्रीय आयुर्वेद संस्थान री ओर ऊं गुरूवार ने जयपुर मांय जोरावर सिंह गेट ऊं सरू व्हे र बड़ी चौपड़ व्हेती थकी पाछी संस्थान परिसर तांई “रन फॉर योगा” राख्यी ज्यी। भारतीय जनता पार्टी न्यारा-न्यारा नेतावां अर कार्यकर्तावां ने योगाभ्यास रा कार्यक्रमां मांय मौजूद रेहवण बाबत् कह्यो है। प्रदेश रा न्यारा-न्यारा ज़िलां मांय ई लोगां मांय योग रा प्रति जागरुकता बधावण सारू केई कार्यक्रम राख्यी ज्या। जोधपुर रा मेहरानगढ़ किला हेटे जन-जागरुकता रैली निकाळी ज्यी अर सामूहिक योगाभ्यास करी ज्यो। विधायक अतुल भंसाली मेहरानगढ़ ऊं रैली ने हरी झंडी बता र रवाना कीनी। सम्राट अशोक उद्यान अर मंडोर उद्यान मांय ई सामूहिक योगाभ्यास रा कार्यक्रम राख्यी ज्या। जैसलमेर मांय बी.एस.एफ. री ओर ऊं ऐतिहासिक सोनार किला मांय जन-जागरण योगाभ्यास कार्यक्रम राख्यी ज्यो।