होळी रो त्यौहार नजदीक आवण रे साथे ही प्रदेशभर मांय तैयारियां करी जा री है। राज्य मांय न्यारी न्यारी ठोडां माथे फागोत्सव राख्या जा रिया है। राजधानी जयपुर मांय आज सूं गलता तीर्थ माथे फागोत्सव री सरूआत व्ही। देवस्थान महकमा री कानी सूं हो रिया इण उत्सव मांय कीर्तन, महाआरती अर न्यारी न्यारी होडां राख्यी गई। हनुमानगढ मांय काले 501 ध्वजावां रे साथे फागोत्सव रैली निकाळी ज्यी। जैसलमेर रा गोविन्दसर गिरिराज जी मांय होरी रसिया अर फाग गाणा हो रिया है। डीग मांय आज सूं दो दिन रा बृज होळी जळसे री सरूआत व्ही। वठी ने भरतपुर मांय काले निकळण वाळी शोभायात्रा री तियारियां करी जारी है। झुंझुनूं साथे न्यारा न्यारा जिलां मांय पुलिस फ्लैग मार्च कर शांतिपूर्ण अर सुरक्षित रूप सूं होळी मनाणे रो संदेश दे री है। करौली मांय आं दिनां फागोत्सव राख्यो जा रियो है। शहर रा खास मदन मोहन जी मिन्दर साथे ग्रामीण अंचलां मांय भी होळी गीतां रा कार्यक्रम राख्या जा रिया है। उठी ने सीकर जिला रा प्रसिद्ध खाटूश्याम जी मांय चाल रिया फागुणी मेळो परवान माथे है। म्हाणा संवाददाता बतायो कि काले एकादशी रे मौके माथे श्याम मिन्दर सूं रथ यात्रा निकाळी जावेली। इण खातिर 125 किलो चांदी सूं बण्योडो रथ तैयार करयो गयो है। झालावाड़ जिला रा झालरापाटन मांय द्वारकाधीश मिन्दर री 62वीं पंचकोसी परिक्रमा आज पूरी व्ही। इण परिक्रमा मांय आसे-पासे रे जिले रे साथे मध्यप्रदेश सूं घणी तादाद मांय श्रद्धालु भेळा व्ह्या।