हरियाली अमावस रे मौके गुरूवार ने प्रदेश रा न्यारा-न्यारा मिन्दरां मांय खास धार्मिक आयोजन राख्यी ज्या। ईं मौके जातरू पवित्र सरोवरां मांय आस्था री डुबकी लगायी। भरतपुर री गौशालावां मांय गायां री पूजा कर र वां ने हर्यो चारो अर गुड़ खिलायी ज्यो। बारां रा सीताबाड़ी मांय संवारे ऊं ई मोटी तादाद मांय जातरू पूगण लाग्या। चित्तौड़गढ़ रा सांवलिया सेठ मिन्दर मांय ई आरे-सारे रा हलका ऊं जातरू पैदल पूग्या। हरियाळी अमावस रे मौके केई ठोडां मेळा भर रह्या है। उदयपुर मांय ई रीति-रिवाज सागे मेळो भर रह्यो है। म्हाणा खबरनवीस बतायो के दो दिन रा ईं मेळा मांय छह सौ ऊं बत्ती दुकानां लगायी ज्यी है। हरियाळो राजस्थान अभियान रा तैत गुरूवार ने केई ठौड़ां मोटी मादाद मांय पौधा रोपी ज्या। संसदीय कार्यमंत्री जोगाराम पटेल जोधपुर री सांगरिया ग्राम पंचायत मांय एक पेड़ मां के नाम रोप्यो। ईं मोके वे लोगां ऊं बत्ता ऊं बत्ता पौधा रोपण अर वां री देख-भाल करण री अपील कीनी। ब्यावर री कृषि उपज मंडी मांय करीब अढ़ाई लाख छायादार अर फलदार पौधा रोपी ज्या। नागौर रा पशु मेला मैदान मांय एक हजार पौधा रोपी ज्या। सवाईमाधोपुर मांय एक पेड़ मां के नाम अर हरियाळो राजस्थान अभियान रा तैत हाल तांई 8 लाख ऊं बत्ता पौधा रोप्या जा चुक्या है। सलूम्बर मांय एक पेड़ माँ के नाम” अभियान रा तहत स्कूली बच्चा 300 पौधा रोप्या। बांसवाड़ा ज़िला रा घाटोल मांय ई 50 ऊं बत्ता फलदार अर छायादार पौधा रोप र वां री देख-भाल री ज़िम्मेदारी लीरीजी। चूरु मांय ई केई ठौड़ां पौधा रोपी ज्या।