स्टेट ओपन स्कूल री दसवीं अर बारहवी री ईं साल री परीक्षा रा नतीजा रो ऐलाण कर दियो ज्यो है। शिक्षा मंत्री मदन दिलावर इण रो नतीजो ऑनलाइन तरीका ऊं जारी कीनो। दिलावर 12वीं रा इम्तिहान मांय अव्व्ल रेहवण वाळी प्रियंका पंवार ने फ़ोन रे ज़रिए बात कर र बधाई दीनी। ईं मौके राजस्थान स्टेट ओपन स्कूल रा निदेशक आशीष मोदी बतायो के स्टेट ओपन परीक्षा रा कोर्स री सामग्री ऑनलाइन तरीका ऊं मुफ्त मुहैया करायी ज्यी है। वे बतायो के साल मांय दो दफ़ा व्हेवण वाळी ईं परीक्षा देवण सारु न्यूनतम योग्यता या अधिकतम आयु सीमा री बंदिश नी है। अर इण मांय महिलावां अर टाबरियां ने मुफ्त प्रवेश दियो जावे है। इण ऊं पैली शिक्षा मंत्री मदन दिलावर आज जयपुर मांय राजस्थान स्टेट ओपन स्कूल रा संदर्भ केन्द्रां रा संस्था प्रधानां री आमुखीकरण कार्यशाला मांय औपचारिक शिक्षा नी ले सक्या लोगां ने शिक्षा री मुख्य धारा ऊं जोड़बा सारू हर संभव कोशिश करण बाबत कह्यो। शिक्षा मंत्री कह्यो के स्टेट ओपन स्कूल मांय मौजूदा दौर मांय राष्ट्रीय मुक्त विद्यालय रो कोर्स चलायो जा रह्यो है जिण री ठौड़ प्रदेश रो खुद रो कोर्स तैयार करणो चाहिजे।