सोमवार ने वर्ल्ड हेपेटाइटिस-डे मनायी ज्यो। लिवर री बीमारियां रा बारा मांय जाग जगावण रा मकसद ऊं दुनियाभर मांय हर साल 28 जुलाई ने ओे दिन मनायो जावे है। लिवर मांय सूजन वाळी हेपेटाइटिस बीमारी ने चुपचाप मार देवण वाळी रा तौर ऊं पिछाणी जावे है। विश्व हेपेटाइटिस दिवस 2025 रो मुद्दो लेट्स ब्रेक इट डाउन राख्यी ज्यो है। प्रदेश मांय ई ईं मौके भांत-भांत रा कार्यक्रम राख्यी ज्या। कोटपूतली-बहरोड़, डूंगरपुर अर बांसवाड़ा मांय रैली निकाळ र ईं बीमारी रा बारा मांय जाणकारी दीरीजी। डूंगरपुर मांय सोमवार ने एक महीना रो खास अभियान सरू करी ज्यो। ईं रा तैत ईं बीमारी ऊं बचाव बाबत् टीका लगावण माथे खास ध्यान दियो जावेला। सवाईमाधोपुर मांय चिकित्सा कर्मचारियां ने हेपेटाइटिस ऊं बचाव रा टीका लगायी ज्या। नेशनल वायरल हेपेटाइटिस कन्ट्रोल प्रोग्राम री राज्य नॉडल अधिकारी डॉ. सुनीता थाकन बतायो के टेमसर जांच अर ईलाज ऊं ईं बीमारी रा गंभीर नतीजा ऊं बचाव कर्यो जा सके है।